«Олд Траффордта» өткен алғашқы матчта париждік клуб алаң қожайындарынан 0:2 есебімен басым түсті. Шабуыл шебіндегі үштіктің екеуі ойынға қатыспаса да, командалық ойынның бар екенін аңғартты. Одан кейін париждік клуб француз біріншілігінде 4 ойын өткізіп, бәрінде жеңіске жетті. Франция кубогында «Дижоннан» басым түсті. Өз алаңында тым жақсы ойнайтынын ескерсек, бүгінгі ойында Сульшер ойыншыларына біраз қиындық тудырары анық. 
«Қызыл сойқандар» ағылшын додасындағы 3 ойынның 2-інде жеңіске жетіп, Англия кубогында лондондық «Челсиды» ұтты. Негізгі құрам ойыншыларының көпшілігі бүгінгі матчтқа қатыспайды. Сарапшылардың пайымдауынша, француз көшбасшылары еш қиындықсыз келесі кезеңге өтеді. Ал, сіз, ғажайыпқа сенесіз бе?
Әлемнің түкпір-түкпірінде әйгілі «Манчестер Юнайтед» клубының жанкүйерлері бар. Тарихы тереңде жатқан клубтың қолдаушылары алдағы 90 минутта бір ғажайыптың боларына сенетіні анық. 
Бүгінгі ойында қай ұжымның асығы алшысынан түседі? Келесі кезеңге өтуге қай клуб лайықты? 
Қызыққа толы кездесуді “QAZSPORT” телеарнасы тікелей эфирде ұсынады. Сүйікті командаңа біздің арнамен бірге жанкүйер бол.