Футболдан Ресейде өтетін әлем чемпионаты кезінде видеоқайталаудың қолданылуы әлі өз шешімін тапқан жоқ. Халықаралық футбол ассоциациялары одағы (IFAB) бұл ережені әлі талқылайтын болады. Видеоқайталауға байланысты футбол мамандарының кеңесі 22 қаңтар күні Цюрихте өтеді. Нақты шешім наурыз айында жарияланатын болады. Өзге спорт түрлері секілді (теннис, хоккей, т.б.) видеоқайталау футболға да енгізілуі мүмкін. Қазіргі таңда бұл ережеге қатысты сынақ жүргізілуде. Тіпті Италия мен Германия чемпионаттарында қолданылып та жүр. Себебі бұл спорт түрінде төрешілер жиі қателікке бой алдырып та жатады. Осындайда видеоқайталаудың қажет болатыны жасырын емес. Әсіресе офсайд кезінде. Дегенмен видеоқайталау ойынның қарқындылығын төмендетіп, уақыт алатыны тағы бар. Сондықтан да спорт сарапшылары мен көп жанкүйерлер футболға видеоқайталаудың енгенін құптамайды. Ал сіз қалай ойлайсыз? Футболға видеоқайталау қажет пе?

Massaget.kz