Садақ ату: Қазақстан әйелдер құрамасы әлем кубогінде жүлдегер атанды
Садақ атудан Қазақстан әйелдер құрамасы Қытайдың Шанхай қаласында өтіп жатқан Әлем Кубогының алғашқы кезеңінде қола медаль жеңіп алды.Айжан Сейдахметова, Адель Жексенбинова мен Виктория Лян үштігі құралмалы садақтан (compound) жүлде үшін кездесуде Эстония мергендерінен басым түсті. Есеп: 231-224.
Осылайша, біздің команда айтулы нәтижеге қол жеткізді. Осыған дейін әйелдер құрамасы әлем кубогінде тұғыр сатысына көтеріле алмай келген.
Айта кетейік, кеше Ұлттық құрама ширек финалда көшбасшылардың бірі Оңтүстік Кореядан басым түсіп (234-230), жартылай финалда Италияға бір ұпай айырмасымен есе жіберді.
Фото: Спорт және дене шынықтыру істері комитеті
