Салауатты өмір салтын ұстануға спорттың тигізер пайдасы зор. «Дені сау ұлт бәсекеге қабілетті болады. Сондықтан спорттың бұқаралық сипатын дамыту – мемлекетіміздің стратегиялық басым бағыттарының бірі» деп Елбасы Жолдауында айтқандай, қазіргі таңда спорттың қай саласы болсын қарқынды дамып келеді. Сәйкесінше байрақты бәсекеде қазақ елінің намысын көкке көтеріп, жеңістің жемісін көріп жүрген жерлестеріміз де жетерлік. Соның бірі – шиелілік Айсамал Сансызбаева.
Сәуір айының алғашқы онкүндігінде Грецияның Ираклион қаласында 20 жасқа дейінгі жастар арасында ауыр атлетикадан Әлем Чемпионаты өтті. Додада Сыр елі мақтанышы, 87 келіден жоғары салмақта өнер көрсеткен Айсамал Сансызбаева серпе көтеруде 112 келімен күміс жүлдеге қол жеткізсе, қоссайыс қорытындысы бойынша 252 келімен әлем чемпионатының қола жүлдегері атанды.

Бұл салмақта оңтүстіккореялық Хе Чжон Пак 281 кг (120+161) көрсеткішпен үздік шықты. Тағы бір оңтүстіккореялық атлет Хье Ен Ким қоссайыс қорытындысында 253 кг (108+145) көтеріп, күміс жүлдеге ие болды.