XXIII қысқы Олимпиаданың басталуына санаулы күндер қалды. Спортшыларымыздың алды Пхенчханға ат басын тіреп үлгерді. Екі күннен кейін олимпиадашылар қалашығында еліміздің көк туы ресми түрде көтеріледі. Қазақстан құрамасында жолдаманың ең көбі биатлоншыларға тиесілі. Бапкерлер Оңтүстік Кореяға 10 спортшы апарды. Олардың арасында біз үміт артқан бұрымдылар бар. Атап айтар болсақ, Галина Вишневскаяның жолына үмітпен қараймыз. Универсиада ойындарының екі дүркін жеңімпазы жаз бойы бапкерімен бірге ұлттық құрамадан бөлек жаттықты. Қырғызстан мен еліміздің шығысында шеберлігін шыңдаған Галина үшін биылғы маусым өте сәтті басталды. Қараша айында әлем кубогінің бірінші кезеңінде  Максим Браунмен жұптасып қола медальға қол жеткізген Вишневская, Олимпиада ойындарында «жүлде алсам» деп армандайды. Сол секілді Дарья Климина да тәжірибелі спортшылардың бірі. 2009 жылдан бері халықаралық жарыстарда әбден ысылған Климинаның да көсілетін кезі осы. Ал ерелер арасында ел намысын  Максим Браун, Роман Еремин және  Владислав Витенколар қорғайды.  Естеріңізге сала кетейік, биатлоншылар бәсекесі 10 ақпан күні басталады.

24.kz