Алматы облысында ат спорты түрлерінен жастар арасындағы бірінші Азия чемпионаты аяқталды, деп хабарлайды «Хабар 24». Бір аптаға созылған байрақты бәсекеде бабы келгендер топ жарды. Азия біріншілігінің финалдық кезеңінде Панфилов кентіндегі атшабар жанкүйерлерге лық толды. Көрермендер арасынан ел спортының тізгінін ұстаған басшылар мен  облыс және қала әкімдері сондай-ақ алыс-жақыннан келген мәртебелі меймандар да бой көрсетті.  Бүкіләлемдік этноспорт форумына келген мамандар ұлттық спортымыздың құндылықтарына тәнті болды. Бір аптаға созылған жарыста үміткерлер ат спортының 4 түрінен сайысқа түскен еді. Аударыспақта жерлестеріміз Нұрбек Аманжол мен Құралбай Ермек, және Нармағанбет Иманғазыұлы мен  Ғабит Ағабектер өз салмақ дәрежелері бойынша чемпион атанса, ең ауыр салмақта Моңғолиядан келген қандасымыз Жеңісбек Серікұлы жеңіске жетті. Баянөлгейде туып өскен Жеңісбек теңге ілуден қола жүлде иеленсе, көкпар тартып күміс алды. Жеңісбек Серікұлы, Моңғолия құрамасының мүшесі: – Ат спорты түрлерінен жақсы нәтижелер көрсетіп жүргенмін. Қазақстанға бірінші рет келіп тұрған жоқ. Жамбы ату мен теңге ілуден де қазақ жастарының қанжығасы майланды. Ал жұрт асыға күткен көкпаршылар сайысының финалында біздің жігіттер Моңғолия құрамасымен күш сынасты. Жергілікті жанкүйерлер алдында қазақ жастары аянып қалған жоқ. Дегенмен Баянөлгейден келген қандастарымыз да намысқа тырысып, 4 салым салды. Есеп 7:4. Қазақстан құрмасының пайдасында.   Жандос Айтбайұлы, тілші: – Алты күн көкпарға шапқан жануар әлі ауыздықпен алысып тұр. Бабында екен. Иә, ат мінсе делебесі қозатын қазақпыз ғой!  Осы «Намыскөкті» тізгіндеген қазақтың намысты жігіттері ешкімге дес берген жоқ. Епті жігіттеріміз теңге ілуде топ жарса, құралайды көзге атқан мергендеріміз жамбы атуда алдына жан салған жоқ.  Ал білекті  де жүректі жігіттеріміз аударыспақ ойынында 4 салмақ дәрежесінде топ жарды. Көкпаршыларымыз жаңа ғана  Моңғолия құрамасын ұтып, Азия чемпионы атанды.
www.24.kz