Қазақстанның бірнеше аймағында дауылды ескерту жарияланды

Қазақстанның бірқатар өңірінде дауылды ескерту жарияланды, деп хабарлайды Baq.kz ақпарат агенттігі «Қазгидромет» РМК-ға сілтеме жасап.

Хабарламада жазылғандай, 8 маусымда Ақмола облысында оңтүстік-батыстан соққан жел солтүстік-батысқа ауысып, секундына 15-20 метр жылдамдықпен соғады. Күндіз кей жерлерде шаңды дауыл күтіледі және бұршақ жаууы мүмкін.

«8 маусым күні түнде Қостанай облысының кей жерлерінде найзағай күркіреп, батыстан соққан жел солтүстік-батысқа ауысады», - делінген хабарламада.

Сондай-ақ, Қызылорда облысының кей жерлерінде түнде дауыл соғып, бұршақ жаууы мүмкін және желдің жылдамдығы секундына 23-28 метр аралығында болмақ. Ал Оңтүстік-Қазақстан облысының кей жерлерінде таңертең және күндіз найзағай ойнап, дауыл күтіледі. Тәулік бойы кей жерлерде оңтүстік-батыстан, солтүстік-батыстан секундына 15-20 метр жылдамдықпен жел соғуы ықтимал.

«9 маусымда Алматы, Жамбыл облыстары мен Алматы қаласының өзендерінде және 10 маусымда Алматы облысының таулы аудандарында жаңбыр болжамына байланысты кей жерлерде су тасқындарының қалыптасуы күтіледі», - делінген хабарламада.