Біздің ел шаңырақ сынды. Ұлттар мен ұлыстар көкке көтеріп тұратын уықтары кереге мен уықтың байланысы бекем болмаса шаңырақтың шайқалары сөзсіз. Ол байланыс бірлігіміз. Елбасының «болашаққа бағдар: Рухани жаңғыру» бағдарламалық мақаласы аясында аудандық мәдениет үйінде тілдер мерекесіне арналған өнер фестивалі болып өтті.
Жиында сөз алған Бауыржан Жаниязов бұл бағытта елімізде қыруар шаруалар жүзеге асырылып жатқанын, Елбасының ұстанған дара саясатын тілге тиек етті. Солардың ішіндегі ең негізгісі Қазақстан халқы Ассамблеясының құрылуы екенін де назардан тыс қалдырмады. Түрі басқа болғанымен тілі бір тіл жанашырларын аудан әкімінің орынбасары марапаттады.
Ассамблеяның негізгі бағыты – еліміздің тарихына терең үңіліп, ұлттық дәстүр мен мәдениетті, ана тілімізді сақтау, дамыту және ұлтаралық ынтымақтастық пен сабақтастықты мейлінше өркендету. Мемлекет басшысы Н.Назарбаев «Елімізде тұратын барлық халықтардың өкілдері ана тілдерінде еркін сөйлей, оқи алуына қолайлы жағдай жасауымыз керек» деп атап көрсеткен болатын. Ұлтаралық қатынастың жақсы жолға қойылуы, халықтар достығының нығаюы , әсіресе, біздің Қазақстан секілді көпұлтты республика үшін қажет.
Ұлттың ұлт болып ұйысып, халық болып қалыптасуына керекті үш нәрсе – тілі, ділі, дінін сақтай білген ел ғана егемендігін баянды, тәуелсіздігін тұғырлы ете алары сөзсіз. Шараның соңы концерттік бағдарламаға ұласып, келген көрермендер ризашылығын білдірді. Үш тұғырлы тілді ту етіп, дамудың даңғыл жолымен, бүкіл әлем танып, мойындаған ел ретінде тіліміз қуатты, тәуелсіздігіміз баянды болып алға қадам баса берейік.

Бекжан Ержігіт.