Денсаулық сақтау саласын оңтайландыру, тұрғындарға мейлінше қолжетімді де сапалы қызмет ету бағыты бойынша мегаполисте ауқымды жұмыстар жүргізіліп жатыр. Мысалы, №1 Шымкент қалалық ауруханасы» мемлекеттік коммуналдық кәсіпорнының «Амбулаторлық хирургия, травматология және гинекология бөлімшесі» «№1 Шымкент қалалық ауруханасы» болып қайта жасақталды. Жаңартылған медициналық мекеме жөндеу жұмыс­тарынан өткізіліп, жаңа заман талабына сай техникалармен жабдықталды.
 
Орталық «№1 Шымкент қалалық ауруханасы» құрамына өт­кен­нен кейін медициналық мекеме то­лық модеринизациялаудан өткі­зіл­ген. Күндізгі стационар бөлі­мін­де науқастардың сапалы ем қабылдауы үшін ПИТ палатасы заманауи үлгідегі ИВЛ құралы, отадан кейінгі науқастарға арналған көп функционалды төсек-орын, қатты және жұмсақ инвентарьмен қамтылған. Мекеме­де кезек күту электрондық жүйеге көшірілген. (Осыған дейін нау­қастар мұнда қысқа да ыңғайсыз дәліз­дерде кезек күтетін). Дәрігерге келген азаматтар мен оларды күтуші­лерге ыңғайластырып кезек күту залына қосымша ғимарат қосылыпты.
 
Амбулаторлық хирургия, травматология және гинекология бөлімшесінің ғимараты және №1 жарақат бекетінде толықтай қайта ағымдық жаңарту жұмыстары жүргізілген, жұмсақ және қатты инвентарьмен қамтылды. Негізгі зертхана жаңынан жаңа ғимарат соғылып қосымша бактерия­логиялық зертхана жасақталды. Алдағы уақытта хирургиялық бейіндегі науқастарға жасалатын оталарды бір күн­дік стационар тәр­тібі­мен жасауды қолға ал­мақ. Сондай-ақ мұнда Шым­­­кент қа­ласы бойынша жарақаттанулардан кейінгі науқастарға ерте реабилитациялық шаралар жүргізу жағы қолға алынады.
 
Амбулаторлық хирургия орталығы Шымкент қаласы ғана емес, облыс тұрғындарына да көмек көрсететіні мәлім. Мұнда жарақаттану, хирургия, оториноларингология, урология, проктология, бет-жақ хирургиясы, антирабиялық қызмет бөлім­шелері амбулаториялық және емханалық қызмет көрсетеді. Сондай-ақ емдеу мекемесі клиникалық-диагностикалық және бактерологиялық зертханамен жарақталған. Мұнда тәулігіне 250 науқасты қабылдауға мүм­кіндік бар. Одан бөлек 30 орын­ға есептелген күндізгі стационарлық бөлімшеде тәулік бойы шұғыл медициналық көмек көр­сететін 2 жарақат бөлімше­сі жұмыс істейді. Мұнда үй не жабайы жануар тістеген жағдайда нау­қастарға үздіксіз көмек көр­се­тілетін тәуліктік рабиология бөлімшесі де бар.
 
Аталған амбулаториялық-хирургия орталығында облыстық жарақаттануды ұйымдастыру-әдістемелік орталығы да жұмыс жасайды. Алдағы уақытта 20 орындық жарақаттан кейінгі ерте оңалту жұмыстарын жүргізу­ге бағытталған бөлім ашу қолға алынбақ.
 
Шымкент қаласы Қазақстанның «үшінші мегаполисі» атал­ғаны баршаңызға мәлім. Яғни қала халқы өсіп келеді. Мұндай келелі өзгерістерге сай болу және сапалы медициналық қызмет көрсеті бағытында қолға алынған іс көп. Соның бірі – орталықтандырылған Антирабиялық қызмет бойынша мамандандырылған тәулік бойы қызмет көрсететін бө­лімше. Антирабиялық қызмет бойынша мамандар дайындау оқу-әдісте­ме­лік шараларын жүзеге асыратын орталық ұйымдастыру көзделген.
 
Ж. ҚАСЫМ.
Zamana.kz