ТЕХНИКАНЫ ҒАНА ЕМЕС, КӨҢІЛДІ ДЕ ЖӨНДЕЙТІН АЗАМАТ

 Қазір телефон мен ноутбук күнделікті өміріміздің ажырамас бөлігіне айналды. Бірі байланыс құралы болса, екіншісі жұмыстың, білімнің, ақпараттың қажетіне жарайды. Ал техника істен шықса, кейде қарапайым ақаудың өзі үлкен мәселеге айналып жатады. Әсіресе жасы үлкен, тұрмысы төмен қарт адамдар үшін бұл оңай емес.

Осындайда қол ұшын созып жүрген азаматтың бірі – телефон мен ноутбук жөндеу ісімен айналысатын Хайдаров Фархад. Ол өз кәсібін нәпақа табудың ғана жолы емес, адамдарға көмектесудің мүмкіндігі деп біледі.

Фархадтың көпшіліктен ерекшелігі – жағдайы төмен, көмекке мұқтаж қарт кісілердің телефоны мен ноутбугін тегін жөндеп береді. Қарапайым ғана көрінетін бұл істің артында үлкен адамгершілік жатыр. Себебі қазіргі заманда телефон – үлкен кісілер үшін де жақындарымен хабарласатын, бала-немересінің үнін еститін ең маңызды құралдардың бірі.

«Үлкен кісілердің кейбірі техниканың тілін түсіне бермейді. Ақауын жөндетуге қаражаты да болмауы мүмкін. Қолымнан келсе, көмектескенді жөн көремін», – дейді Фархад.

Жақсылықтың міндетті түрде үлкен болуы шарт емес. Біреуге қиындық туғызған істі жеңілдету, қарияның қажет дүниесін тегін жөндеп беру де – сауапты іс. Осындай азаматтардың әрекеті қоғамдағы мейірімнің әлі де бар екенін көрсетеді.

Телефон мен ноутбукты жөндеу – оның кәсібі. Ал мұқтаж жанға ақысыз қызмет көрсетуі – оның азаматтық ұстанымы.

Жақсылық жасаған жанның аты алысқа кетпеуі мүмкін. Бірақ оның көмегін көрген адамның жүрегінде қалатыны анық.