Су байлығын сақтайық

Табиғат – адамзатқа берілген сарқылмас қазына. Сол қазынаның бірі – су байлығы болса, сол судың ішінде тіршілік етіп, адам игілігіне қызмет етіп келе жатқан мол ырыс – балық. Қазақ халқы ерте заманнан-ақ өзен-көлдің қадірін біліп, судың да, ондағы тіршіліктің де қасиетін терең түсінген. «Сулы жер – нулы жер» деген даналық сөз бекер айтылмаса керек. Өйткені тіршіліктің нәрі болған су бар жерде береке де, ырыс та мол болады.
Бүгінде балық шаруашылығы әлем экономикасының маңызды саласына айналып отыр. Өзен мен көл жағалаған елдер балық кәсібін дамытып, оны табыс көзіне айналдырған. Себебі балық – тек тағам емес, ол – халық денсаулығының кепілі, кәсіптің көзі, ел экономикасының қуаты.

Қазақстан табиғи су ресурстарына бай мемлекеттердің қатарында. Каспий мен Арал, Балқаш пен Зайсан, Ертіс пен Сырдария секілді айдындар ежелден балыққа бай өңірлер саналған. Әсіресе Сыр бойындағы халық үшін балықшылық ата кәсіптің біріне айналған. Кезінде Арал теңізінің толқынында мыңдаған балықшы күнелтіп, өңір экономикасының дамуына үлес қосты. Арал балығы алыс-жақын елдерге жөнелтіліп, қазақ даласының атағын асырды.

Алайда уақыт өзгеріп, табиғат тепе-теңдігі бұзылған шақта бұл сала да түрлі қиындықтарды бастан өткерді. Теңіздің тартылуы, су көздерінің азаюы, экологиялық мәселелер балық қорының кемуіне әсер етті. Соған қарамастан соңғы жылдары балық шаруашылығын қайта жандандыруға ерекше көңіл бөлініп келеді. Бұл – табиғат байлығын сақтауға деген жауапкершіліктің көрінісі.

Балықтың адам денсаулығына пайдасы орасан. Оның құрамындағы дәрумендер мен пайдалы май қышқылдары адам ағзасын қуаттандырып, түрлі аурулардың алдын алады. Сондықтан дәрігерлер балық тағамын жиі тұтынуға кеңес береді. Халқымыз «Ас – адамның арқауы» дейді. Ендеше, құнарлы ас саналатын балықтың дастарқаннан орын алуы – денсаулық кепілі.

Қазіргі таңда елімізде балық өсіру ісі біртіндеп дамып келеді. Заманауи технологиялар енгізіліп, арнайы шаруашылықтар ашылуда. Бұл – жаңа жұмыс орындарының көбеюіне, халық тұрмысының жақсаруына жол ашады. Сонымен қатар отандық өнім көлемінің артуы азық-түлік қауіпсіздігін қамтамасыз етуге мүмкіндік береді.

Табиғаттың әр байлығы – аманат. Сондықтан балық қорын сақтау – баршамыздың ортақ міндетіміз. Заңсыз аулауға тосқауыл қойып, өзен-көлдерді ластамау, табиғатқа жанашырлықпен қарау – келешек ұрпақ алдындағы жауапкершілік.

Қорыта айтқанда, балық – халыққа несібе болған табиғат сыйы. Ол – ырыс пен берекенің, еңбек пен кәсіптің белгісі. Суын қадірлеген ел байлығын да бағалайды. Сондықтан балық шаруашылығын дамыту – ел болашағына жасалған маңызды қадам. Расында да, «Балық – байлық көзі».