«Павлодар мұнай-химия зауыты» ЖШС-де биылғы 1 мамырдан бастап мұнай өңдеу тарифі өзгереді. Жаңа тариф тоннасына 35 400 теңгені құрайды (ҚҚС-ты есептемегенде), деп хабарлайды Egemen.kz. Бұл шешім өндірістік процестердің сенімділігі мен тиімділігін, экологиялық қауіпсіздігін қамтамасыз етуге бағытталған негізгі инвестициялық жобаларды қаржыландыру қажеттілігіне байланысты қабылданып отыр.

«2025 жылы зауытта дизель отынын гидротазарту қондырғысын қайта құру көзделген. Бұл өнімнің сапасын жақсартуға және оның заманауи экологиялық стандарттарға сәйкес келуіне мүмкіндік береді. Бұған қоса барынша тұрақты және болжамды өндірістік циклды қамтамасыз ететін кеңейтілген жөндеуаралық кезеңге көшу, қайталама процестердің жүктемесін ұлғайту нәтижесінде мұнай өнімдері себетін жақсарту жоспарланған. Операциялық тәуекелдерді төмендетуге және өнеркәсіптік қауіпсіздік деңгейін көтеруге ықпал ететін технологиялық процестерді басқару жүйелері автоматтандырылады. Аталған шаралар кәсіпорынның тұрақты дамуына және өңдеудің жоғары деңгейін сақтауға бағытталған. Инвестициялық жобаларды іске асыру жеңіл мұнай өнімдерінің өнімділігін 73%-дан 75% -ға дейін ұлғайтуға мүмкіндік береді», деп мәлімдеді кәсіпорынның баспасөз қызметінен.