Сындарлы саясатымен егеменді елімізді басқарған Елбасы Нұрсұлтан Әбішұлы Назарбаевтың қазақ халқы үшін орны ерекше.Тұңғыш Президенттің есімі Егемендік, Тәуелсіздік, Қазақстан, Отан, Бірлік сияқты ұғымдармен қатар айтылады. Елбасы – татулығымыздың, береке-бірлігіміздің, тұрақтылығымыздың кепілі. Тұңғыш Президенттің еңбек жолы – жас қазақстандықтар үшін үлгі мен тағылымның мектебі.
Осыдан 15 жыл бұрын маған республикалық әйелдер форумына қатысу бұйырды. Тарихи жиында елдің түпкір-түпкірінен келген іскер әйелдер, көшбасшылар, зиялы қауым өкілдері болды. Форумда Нұрсұлтан Әбішұлын алғаш рет жүзбе-жүз көрдім. Сол жиыннан алған ерекше әсер маған үлкен шабыт сыйлаған еді. Одан бері де 2012 жылы «Nur Otan» партиясының белсенді қызметкері аталымымен марапатталдым, ал 2015 жылы «Ерен еңбегі үшін» медаліне ие болдым. Ел дамуы үшін жасап жатқан еңбегіміз ескеріліп, қандай да бір марапатқа ие болсақ, ол – тек халықтың ыстық ықыласы мен ұлт көшбасшыларының сарабдал саясатының арқасы деп білемін.

Ел болашағы үшін жасалып жатқан игі істер табысты болып, еліміз, елін сүйген, елдің қамқоры болған азаматтарымыз аман болсын! Баршаларыңызға табыс, сәттілік, сәулелі ғұмыр тілеймін. Аудан тұрғындарын 1 желтоқсан – Елбасы күнімен шынайы ықыласпен құттықтаймын!