Мемлекет басшысы Қасым-Жомарт Тоқаевтың мәлімдемесі жарияланды. Онда Президент бүгінде әрбір қазақстандықты толғандыратын барлық сауалға толыққанды әрі нақты жауап берді. Ең алдымен төтенше жағдай режимін осы жылдың 11 мамырына дейін созу шешімі қабылданды. Бұл орын алып отырған қазіргі қиындықтардан туындаған жайт. Өкінішке қарай, індеттің шарықтау шегі әлі өткен жоқ. Бір сәтте карантиндік шараларды алып тастаған жағдайда осы уақытқа дейін қол жеткізген жетістіктеріміздің бәрі, нақты айтқанда вирустың тарау жағдайын бақылауда ұстау зая болады және ауруға шалдығудың жаңа толқынымен бетпе-бет келеріміз әбден мүмкін еді. Бұл өте қауіпті. Коронавирус індетінің қаншалықты тез тарайтынына осыған дейін көзіміз жетті. Шағын ғана ауданымыздың өзінде қаншама науқас тіркелді. Бірақ білікті дәрігер мамандарының арқасында жазылып шыққандардың саны күн санап артып келеді. Науқасты айықтырып, денсаулығын қалпына келтіруге барынша жұмыс жасау – біздің кәсіби міндетіміз.

Сонымен қатар Мемлекет басшысы денсаулық сақтау министрлігі ауруды тест арқылы анықтау жұмысын барынша күшейтуге тиіс екенін алға тартты.

"Тестті халықаралық стандартқа сәйкес тәулігіне кем дегенде 20-25 мыңға дейін жеткізу қажет. Осыған орай, үкіметке қысқа мерзім ішінде отандық тест-жүйесінің өндірісін қолға алуды тапсырамын. Біз иммунобиологиялық препараттарды әзірлеу үшін қолда бар мүмкіндіктерімізді толық пайдалануымыз керек. Вакцина қолжетімді болған кезде Қазақстан шетелдің дәрі-дәрмегін күтіп отырмауы қажет", - дейді ол.

Сөзінше, дағдарыстан кейін де еліміздегі медицинаны дамытуға баса мән беріледі екен.

"Медицина саласына мемлекет тарапынан ауқымды қолдау көрсетіледі. Үкімет халық денсаулығы және денсаулық сақтау жүйесі туралы жаңа кодекс жобасына осы саланы жетілдіретін нақты ұсыныстар енгізуге тиіс. Парламент бұл кодексті сессияның соңына дейін қабылдайды деп ойлаймын", - деп қосты Президент.

Иә, карантин кезеңіне шыдап, үйден шықпай отыру оңай емес. Дегенмен қазір ең тиімдісі осы болып отырғаны бәрімізге белгілі. Бұл жағдайға бір айдан аса уақыт шыдадық, енді бас-аяғы екі апта мерзімде сабырлық сақтап, ережені сақтасақ, дертті ауыздықтайтын күн жақын.