Жуырда өскелең ұрпаққа ұлағатты тәрбие беріп, бабалардан жеткен асыл сөзді насихаттау мақсатында Тартоғай ауылындағы №153 Ш.Есенов атындағы мектеп-лицейінде «Аталар жолы» атты ауыл ақсақалдарымен кездесу өтті. Келелі кездесуді аталған мектептің тәрбие ісі жөніндегі орынбасары Б.Ерімбетов, мектеп-лицей тәлімгері А.Сарбасова, білім ордасының психологы А.Мауленова және 9-10 сынып жетекшілері ұйымдастырды. Оқушылар ауылда абырой биігінен көрініп жүрген М.Омаров, С.Тәжібаев, А.Абдіраманов, С.Садуақасов, Х.Қаденов, Б.Пірімбетов, Е.Досжанов сынды ақсақалдармен жүздесті. Тағылымы мол шараны мектеп-лицей директоры Қ.Амзиев ашып беріп, ауыл ақсақалдарының алдағы ғұмырына жақсылық, бақыт, қуаныш тіледі. Сондай-ақ қариялардың елді мекеннің өсіп-өркендеуіне қосқан сүбелі үлестері үшін алғыс білдірді.

Рухани шара қатысушылардың өмірі өнегемен өрілген тұлғалардың ғұмыр тарихымен танысуынан басталды. Одан кейін ұйымдастырушылар интелектуалды «Қызық екен» ойынын ұйымдастырып, ауыл тарихы, жер-су аттары және көше атаулары туралы қызықты һәм керекті сұрақтарға жауап алды. Ал «Аталар сөзі – ақылдың көзі» кезеңі бойынша аузы дуалы, сөзі уәлі ақсақалдар қазақ халқының әдет-ғұрпы, салт-дәстүрі хақында сөз өрбітті. Шара барысында 3 сынып оқушылары «Ата өсиеті» тақырыбында көрініс қойып, көрерменнің ыстық ықыласына бөленді.

«Ауылыңда қартың болса, жазылып қойған хатпен тең» демекші, қарттардың ғибраты мен тәлім-тәрбиесі – ілкімді істерді жалғастыруға жол сілтеуші. Сол себепті әр адам іс бастамас бұрын батагөй қарияның ақ батасын алса құба-құп. Осы орайда шара ұйымдастырушылары да қазыналы қарттардан бата алып, рухани азық жинады.

Маржан БОЛАТҚЫЗЫ