Өткен жылы аймақтағы 88 кәсіпорын мен мекеме 1855 жұмысшы алдындағы 226 млн 100 мың теңге жалақы қарызын қайтарды. Өңірлік коммуникация орталығында өткен брифингте облыс әкімінің орынбасары Қуанышбек Ысқақов бұл мәселенің қатаң бақылауда екенін жеткізді.
Заң талабын бұзғандарға 213 нұсқама беріліп, 6,6 млн теңге мөлшерінде әкімшілік айыппұл салынды. Оның 6,5 млн теңгесі өндірілді. Бүгінде жалақыға берешегі бар бірде-бір жұмыс беруші тіркелмеген. Облыс аумағында орналасқан 22 бірлескен компанияда 6813 адам жұмыс істейтін болса, соның 652-сі немесе 10,5 пайызы сырттан келген. Шетелдіктермен арада шиеленіс туындамауы үшін дағдарыс штабы, арнайы комиссиялар мен кәсіподақтар жұмыс істеп жатыр. Алпауыт компаниялардағы жерлестеріміздің ахуалы – жергілікті биліктің жіті назарында.
–Қазіргі күні еліміздегі мұнай ұңғымаларынан алынып жатқан өнімнің 98 пайызы – су. Бұл мұнай өндіру көлемінің едәуір төмендеуіне әсер етті. 2016-2017 жылдары Қызылордадағы мұнай компанияларында жұмыстан қысқарту жағдайлары болды. Осыдан кейін аймақ басшысы бірнеше компания басшылығының «адамдардың жұмыс уақытын 8 сағаттан 5-6 сағатқа дейін азайтсақ та өздерін қысқартпаймыз» деген келісімін алды. Ал босап қалғандарды мәселе реттелген кезде қайтадан жұмысқа алатын болып шешілді,- деді облыс әкімінің орынбасары.
2017 жылдың ІІІ тоқсанында жұмыссыздық деңгейі 4,8 пайызды құрады. Былтыр барлығы 23377 адам жұмыспен қамтылса, оның 13987-сі – тұрақты жұмысқа, 6323-і – жергілікті бюджет есебінен төленетін қоғамдық жұмыстарға, 1803-і – жастар тәжірибесімен, 1244 адам әлеуметтік жұмыстарға орналасты. Мекемелер мен кәсіпорындарда тәжірибеден өткен 1800-ден астам жас маманның 21% ғана сонда орныққан.
Облыс әкімінің орынбасары өзі жетекшілік ететін салалар бойынша өткен жылы атқарылған жұмыстар жайында тарқатып айтып берді. Осы уақыт ішінде өнеркәсіп кәсіпорындарында 773,2 млрд теңгенің өнімі өндірілді. Жеңіл өнеркәсіп, мұнай өңдеу өнімдерін өндіру, резеңке және пластмасса бұйымдарын, металлургия өнеркәсібі көлемінің артуына байланысты өңдеу өнеркәсібіндегі өсім 4,6%-ке жетті.
–Индустрияландыру бағдарламасы шеңберінде жалпы құны 37,6 млрд теңге болатын 284 жұмыс орнына лайықталған шыны зауыты мен екі окись молибден ұнтағын үш окись молибденге айналдыру жобалары жүзеге асырылды. 612,3 мың шаршы метр тұрғын үй пайдалануға берілді. Ауыл шаруашылығы бағытында 86,1 млрд теңгенің өнімі өндірілді. Мемлекеттік бюджетке 104 672,4 млн теңге салық және басқа да міндетті төлемдер түсті, – деді Қ.Ысқақов.
Бүгінде жергілікті бюджеттің 60%-дан астамы әлеуметтік салаларға бағытталған. Өткен жылы соның 2 млрд 800 млн теңгесі мүмкіндігі шектеулі азаматтарға тиісті жәрдемақы есебінде берілді. Соңғы статистикаға сәйкес облыс бойынша осы санаттағы адамдар саны 29 мыңнан асады.