Лондондағы ICE биржасында Brent маркалы мұнайының тамыз айындағы фьючерстерінің бағасы Астана уақыты бойынша 09:45-тегі мәлімет бойынша 1,83 пайызға өсіп, барреліне 78,42 долларды құрады.

WTI маркалы мұнайдың тамыз айындағы фьючерстерінің құны 1,88 пайызға өсіп, барреліне 75,23 доллар болды.

Мұнай бағасының өсуіне АҚШ-тың Иранның ядролық нысандарына жасаған соққылары себеп болды. Бұл жағдай мұнай мен табиғи газдың әлемдік саудасының 25–30 пайызы өтетін Ормуз бұғазының жабылу қаупін тудырды.

Бұл Қазақстан үшін нені білдіреді?

Мұнай экспорттаушы ел ретінде Қазақстан үшін әлемдік бағалардың өсуі – оң сигнал. Қара алтынның құнының артуы дәстүрлі түрде бюджет кірістерінің ұлғаюына, сауда балансының жақсаруына және ұлттық валютаның нығаюына ықпал етеді. Сонымен қатар, мұнай бағасының өсуі жалпы экономиканы қолдап, Ұлттық қорға түсетін түсімдерді арттырып, инфрақұрылымдық жобаларды жүзеге асыру мүмкіндіктерін кеңейтеді.

Қазақстанның 2025 жылғы бюджетінде мұнайдың бір баррелінің бағасы 75 доллар деңгейінде белгіленген.