Боливияда алғаш рет үндіс тайпаларына автономдық үкімет құруға рұқсат берілді. Мұндай егемендік Уручипайя байырғы халқына қажет. Енді автономдық билік тайпаның салт-дәстүрін сақтап қалып, тұрмысын жақсартумен айналысады. Айта кеткен жөн, ғалымдардың айтуынша, Уручипайя 4 жарым мың жыл бұрын пайда болған. Қоныстары Боливияның батысындағы Анд тауы. Алайда қазір бұл тайпа өкілдерінің саны азайып барады. Өйткені үйреншікті өмір салты өзгерген. Кезінде бұл халық өкілдері Поопо көлінің арқасында күнін көріп келді. Ерлері су қоймасынан балық аулайтын. Алайда ондағы су деңгейі төмендеп, 2016 жылы құрғап қалды. Енді көбісі нәпақа табу үшін өзге аймақтарға аттануға мәжбүр. 

www.24.kz