Тоңдырды мені,

Тоңдырды сені,

Желтоқсан желі ызғарлы.

Солдырды гүлді,

Оңдырды нұрды,

Көңілде мұңды із қалды…

Желтоқсан… Бұл атау естіген жанның жүрегіне мұң ұялатпай қоймасы анық. 1986 жылдың қытымыр желтоқсаны – қазақ халқының рухы сыналған, намысы оянған сәт. Сол бір ызғарлы күндерде алаңға жиналған жастардың дауысы тұтас ұлттың арман-аңсарының жаңғырығы еді. Ел тағдырына бейжай қарамаған қазақ жастары әділетсіздікке төзбей, 17 желтоқсанда Алматының орталық алаңына ағылды. Олар қаруланған жоқ, тек жүректерінде намысы, жүздерінде сенімі бар еді.

Желтоқсанның суық желі сол күндері ызғарлы ғана емес, қанмен суарылған еді. Бейбіт шерушілерге билік тарапынан күш көрсетілді. Қолдарында қаруы жоқ, бірақ рухы биік жастарды өрт сөндіру машиналарымен суық суға малып, резеңке таяқпен ұрды, ұстап әкетіп, темір тордың ар жағына қамады. Бұл күн тек Алматының ғана емес, бүкіл қазақ даласының қайғысы мен намысының күніне айналды.

Сол күндері қазақ халқының талай батыр ұл-қыздары ел үшін еңіреп шықты. Қайрат Рысқұлбековтің ерлігі ел тарихында мәңгілікке жазылып қалды. Оның сот алдында айтқан сөзі әр қазақтың жүрегінде жаңғырады: «Менің халқым ешқашан құл болмаған, болмайды да!» Бұл сөздер оның жанайқайы ғана емес, ұлттың арман-тілегі еді. Желтоқсанның желі бодандықтың шынжырын үзіп, еркіндікке жол ашты. Желтоқсанның суық желі шерушілердің жанарындағы үміт отын өшіре алмады. Қытымыр аяз бен қатал билікке қарамастан, жастар қайсарлық танытты. Олар алаңға шығып, қазақ халқының намысын қорғады. Бірақ бұл бейбіт шеру аяусыздыққа ұласты. Биліктің қаһары жас жүректерді мұздатып, еркіндікке ұмтылған саналарды тұншықтырғысы келді.

16 Желтоқсан – бұл тек өткеннің тарихы емес, ол болашаққа өнеге. Сол күндердегі батырлардың ерлігі мен қайсарлығы әр қазақ баласының бойында намыс отын маздатып, рухын көтерері анық. Желтоқсанның ызғарлы желі ел жүрегінде мәңгілік ұмытылмас бірлік пен еркіндік жыры болып қалмақ.

Желтоқсан оқиғасы тарих қана емес, ұрпаққа аманат. Сол күндердегі батырлардың күресі мен жанкештілігі бізді өз ұлтымызды құрметтеуге, еркіндігімізді бағалауға шақырады. Желтоқсанның желі ешқашан ұмытылмайды, ол әрқашан қазақ рухының биіктігін еске салып тұрады. Ендігі міндет – сол ерліктің отын сөндірмей, тәуелсіздік туын мәңгілік желбірету.