Ерлан Қарин қырғыздың мемлекеттік хатшысымен кездесті

Мемлекеттік кеңесші Ерлан Қарин Қырғызстанның Мемлекеттік хатшысы Марат Иманқұловпен жүздесіп, сөйлесті деп жазады Egemen.kz. Мәртебелі мейманға Президент Қасым-Жомарт Тоқаевтың елімізді одан әрі жаңғыртуға бағытталған жаңа бастамалары туралы айтылды. Қырғызстан өкілі мәдениет және білім саласындағы жобаларды жүзеге асыру жоспарын айтты. Кездесуде екі ел арасындағы мәдени-гуманитарлық ынтымақтастықты тереңдету перспективасы талқыланды. Тараптар бірлескен жобаларды жүзеге асыруға және шығармашылық бағыттағы бастамаларды қолдауға дайын екенін жеткізді.

Сонымен қатар Ерлан Қарин мен Марат Иманқұлов Ұлттық орталық музейге барды және Тоқтағұл Сатылғанов атындағы Қырғыз ұлттық филармониясы әйгілі жазушы Шыңғыс Айтматов повесінің желісімен қойған «Жәмилә» мюзиклін тамашалады.