Петропавл қаласында «Auyl Fest. Қаз шаруашылығы» атты халықаралық фестиваль өтті. Іс-шараны «Ауыл» партиясының құрылғанына 25 жыл толуына орай осы саяси ұйым Солтүстік Қазақстан облыстық әкімдігімен бірлесіп ұйымдастырды. Бұл – түркі халықтарының арасында қаз өсірудің ежелгі әдістері мен тәсілдерін насихаттауға бағытталған іс-шара. Сонымен қатар осынау іс-шараға «Бірінші халықаралық түркi этномәдени фестивалі» деген қосалқы атау да беріл­ген. Сондықтан фестивальға түркітіл­дес елдер Мажарстанның «Gallicoop», Башқұрт­станның «Башкирская птица», Мари Эл Республикасынан «Лотфуллин» компанияларының, сондай-ақ Татарстан мен Чувашияның құс өсіру саласы­­­ның өкілдері қатысты.

Қызылжардағы қазға арналған фести­валь шаһардың ең үлкен сарайы Н.Погодин атындағы орыс драма театрын­да ашылды. Оның ресми сал­та­н­атына Мажарстанның бас консулы Соке Саболч, Татарстанның татар кәсіп­керлеріне көмек жөніндегі Дүние­жүзілік қауымдастығының атқару­шы директоры Фарид Уразаев және Башқұртстан, Чувашия және Мари Эл Республикасынан құс өсіру саласының басшылары, өз елімізден Батыс Қазақ­стан, Ақмола, Қарағанды, Қостанай, Солтүстік Қазақстан облыстарының ауыл шаруашылығы мамандары қатысты. Жиынды Солтүстік Қазақстан облы­сының әкімі Ғауез Нұрмұхамбетов ашып, жүргізіп отырды. «Ауыл» партия­сының төрағасы Серік Егізбаев аталған іс-шараның маңызына тоқтала келе, қамтылған мәселелер саланың дамуына тың серпін береріне сенім білдірді.

«Бұл бірегей бастама ынтымақтас­тықты дамыту, бірлікті нығайту және Қазақстан халқының экономикалық мұрасын сақтау, ауыл тұрғындары арасында қаз өсіруге қызығушылық арттыру, агроөнеркәсіптік кешенге инвести­ция тартуды көздеген игі іс-шара боларына сенімдіміз», деді ол.

Солтүстік Қазақстан облыстық ауыл шаруашылығы басқармасының бас­шысы Дәурен Тоқушынов өңір­дегі құс шаруашылығын дамыту­­­дың келешегі мен мәселелері туралы айтты. Сонымен қатар ол осы сала бо­йын­ша шетелдіктермен ынтымақтасуға әзірлігін білдірді.

Форум барысында қаз шаруашылығы бойынша Мажарстан мемлекетімен ынты­мақ­тасуды нығайту, саланы дамытудың практикалық негіздері, құрамажем және ол үшін концентраттар өндіру, мамық өңдеу, сою мен өткізу, Батыс Қазақстан облысында қаз өсіру тәжірибесі мен Алматы облысында қаз шаруашылы­ғын дамыту барысы сияқты мәселелер талқыланды.

Бұған қоса осыдан біраз жыл бұрын қанатқақты жоба ретінде Ақмола облысында бірнеше отбасына 160 қаз балапанынан бағу үшін тегін берілгенін, олардың жемі мен ветеринарлық бақылауды өздері жүргізгенін, ал арада 4-5 ай өткенде бағушылар фермерлерге оның санының тек 25 пайызын ғана қайтарып, шығынын өтегенін, ал қалғанын өздері қалауынша сатып, 1,5 млн теңгедей табыс тапқаны айтылды. Қазір сол отбасыларының кейбірі 1,5 мыңдай балапан асырап, сатуға қол жет­кізіп отыр екен. Міне, осындай озық тәжі­рибелерді тарату жағы насихатталды. Фестиваль барысында қаз етінен жасалған тағамдар ұсынылды. Ресей жерінен келген татар, башқұрт және т.б халықтардың аспаздары дайын­даған бұл дәмдер тіл үйірді. Олар қы­зы­­­ғу­шыларға тағамды дайындау ре­це­п­­­терімен де бөлісті. Ал театр алдын­дағы алаңда фермерлік және кәдесый тауарларының жәрмеңкесі қы­зып жатты. Осы жерде ер-тоқым түрлері, ат әбзелдері сөрелерде самсап тұрды. Фестиваль қала­ның бас алаңында да жалғасып, мұнда асық ату, армрестлинг, гір көтеру, қаздар жарысы және т.б спорт жарыс­тары мен этнофольклорлық ансамбль­дер концерті өтті. Бұрын-соңды Қызыл­­жарда болмаған қаз жарысының да өзіндік қызығы көп болып, көрермендерді мәз қыл­ды. 20 қаз қатысқан қоршаулы жол­дың бойында көрермендер қаздарды телефондарымен түсіріп әлек. Осылайша, Сол­түс­тік Қазақстан көктемінің алғашқы күн­дерінде елді елең еткізген, халықты шаттыққа бөлеген ерекше думан салтанат құрды.

 

Солтүстік Қазақстан облысы