Биыл Ақтау қаласы Түркі әлемінің мәдени астанасы атанып, эстафетаны Түрікменстанның Анау қаласынан қабылдап алған соң-ақ өңірде қызу дайындық басталған болатын. Ауқымды іс-шараның ұйымдастырушылары - ТҮРКСОЙ Халықаралық ұйымы, еліміздің Мәдениет және ақпарат министрлігі мен Маңғыстау облысының әкімдігі. 

Сәуір айы басталысымен Қырғызстан, Түрікменстан, Түркия, Өзбекстан, Әзірбайжан елдерінен өнерпаздар делегациясы келе бастады. Ақтаулықтар оларды теңіз жағасына арнайы құрылған «Дархан дала» этно қалашығында қарсы алды.

«Дархан дала» этно-қалашығындағы Маңғыстау облысының әр аудан, қалаларына бөліп берілген «Суын айғыр», «Шерқала», «Дәстүр», «Батырлар», «Жеті қайқы», «Ғашықтар» және «Шеберлер» ауылдары қойылымдар қойып, әннен шашу шашып, көрмелерді таныстырып, шеберлік сағаттарын өткізді. Салт-дәстүр мен мәдениетті дәріптеген іс-шара бірнеше күнге жалғасты.

Киіз басу, ұршық иіру, келін түсіріп, бет ашу, ұлттық би, сондай-ақ қолөнер бұйымдарынан көрме ұйымдастырып, халқымыздың ұлттық бай тарихы, өнері қонақтар назарына ұсынылды. Қонақтар да қалыс қалмай, өз бұйымдарын, ұлттық ерекшеліктері мен жәдігерлерін жайып көрсетті.

Бірнеше күн қатарынан облыс аудандарынан келген өнерпаздар ән мен жырды әуелете концерт қойды. Мысалы 5 сәуір күні түпқарағандық өнерпаздар бастаған мерекелік концерт ТҮРКСОЙ әртістерінің гала концертіне жалғасса, түсте Мұнайлы ауданы ән-жырдан шашу шашты. Түсқайта Жаңаөзен қаласы мен Маңғыстау ауданы өнерпаздары дайындаған концерттік бағдарламасы ұсынылды.

Ақтаудағы айтулы мерекеге ТҮРКСОЙ-ға мүше мемлекеттерден 200-ге жуық қонақ келді. Олардың арасында 50-ге жуық лауазымды тұлғалар мен халықаралық ұйымдардың басшылары болса, қалғаны шетелдік өнерпаздар. Одан бөлек, ауқымды шараны тамашалауға еліміздің түкпір-түкпірінен де тұрғындар ағылып келіп жатыр. Теңіз жағасындағы бас сахнада кешкі сағат 19.00-де «Ақтау – Түркі әлемінің мәдени астанасы» шарасының салтанатты ашылу рәсімі өтеді. Ашылу салтанатына Димаш Құдайберген қатысып, ән әуелетпек.