Жақында Шиелі аудандық көпбейінді орталық ауруханасында үздік тәжірибелік орталық ашылды. Мұндағы мақсат – тұрғындардың қажеттілігі мен сұранысын қанағаттандырып, сапалы медициналық-әлеуметтік көмек көрсету арқылы халықтың денсаулығын нығайтуды ұйымдастыру. Ашылу салтанатына қатысқан облыс әкімінің бірінші орынбасары Данияр Жаналинов халықтың медициналық қызметке қолжетімділігін арттыру, денсаулық сақтау инфрақұрылымын жетілдіру шаралары жайлы баяндап берді. Одан соң «Primary Health Care» Ұлттық қауымдастығының президенті, академик Төлебай Рахыпбеков, Шиелі ауданының әкімі Айтбай Жандарбеков, Облыстық денсаулық сақтау басқармасының басшысы Олжас Искаков, «Primary Health Care» Ұлттық қауымдастығының Қызылорда облыстық филиал басшысы Рахима Сералиева іс-шараға сәттілік тілеп, жылы лебізін білдірдi.

Мұнан соң, салтанатты жиынға келген қонақтар мен сала мамандары орталықтың жұмысымен танысып, арнайылап ашылған тыныштық бөлмесі, жастар денсаулық кабинеті, денсаулық мектебі сынды онға тарта арнайы бөлмелер мен ондағы мамандардың жұмысымен танысты. Айта кетейік, үздік тәжірибелік орталық жобасы өткен жылдан бері «Premy Health Care» Ұлттық қауымдастығымен бірге алғашқы медициналық көмек көрсететін ұйымдарға жаңа технологияларды енгізу арқылы жүзеге асырылып жатыр. Алдағы уақытта мұндай орталықтар №3 және №6 қалалық емханаларда және Жалағаш аудандық ауруханасында ашылмақ. Бұл халықтың медициналық көмекке қолжетімділігін арттырады. Сонымен қатар «Primary Health Care» Ұлттық қауымдастығының қолдауымен емхананың 107 қызметкері оның ішінде, 68 дәрігер, 39 орта буынды қызметкер біліктіліктерін арттырған болатын. Жалпы, бұл жоба денсаулық сақтау саласын дамыту және халыққа сапалы медициналық көмек беруде нәтижелі әрі тиімді жоба деп сеніммен айта аламыз.