ТЕАТР – ӨМІР АЙНАСЫ
Театр – тірі организм. Тынымсыз тіршіліктен бір сәт тыныш табатын саф өнердің ордасы. Сана тазарып, рухани тоят табатын мәдениеттің мекені. Қым-қуыт оқиғаларды қиыннан қиыстырып, өмірмен ұштастыра бейнелегенде ақыл мен жүректе өзара арпалыс басталады. Бұл – сахнаның киелілігі мен әртістің шынайы шеберлігі. Театр тағдырға төрелік етпейді. Тек жақсы мен жаманды нұсқап, ақ пен қараны анық көрсетіп, өмір болмысын боямасыз көз алдыңа әкеледі. Әрі қарай көрермен түйінді оймен соңғы нүктені өзі қояды.Кеше аудандық мәдениет Үйінде 27 наурыз Халықаралық театр күні орай «Театр – өмір айнасы» атты мәдени-рухани танымдық кеш өтті.
Кеште Т.Ахтановтың «Махаббат мұңы», М.Әуезовтың «Еңлік-Кебек», С.Балғабаевтың «Біз де ғашық болғанбыз», Қ.Бекпейістің «Діннен шыққан дүрбелең» драмаларынан және Ш.Айтматовтың «Ана–Жер–Ана» трагедиясынан үзінділер көрсетілді.
Ғ.Мүсірепов атындағы балалар мен жасөспірімдер театрының актеры, Қазақстан Республикасының еңбек сіңірген қайраткері, жерлесіміз Жомарт Зейнәбіл арнайы құттықтауын жолдады.
