Мемлекет басшысы Қасым-Жомарт Тоқаев "Қазақстан Республикасының кейбір заңнамалық актілеріне мемлекеттік қызмет мәселелері бойынша өзгерістер мен толықтырулар енгізу туралы" Заңға қол қойды.

Заңнамада ұлттық және өзге де жобаларды іске асыру үшін бір жылға тартылатын "келісімшарттық қызметкерлер" деген жаңа ұғым пайда болады.
Түзетулер өңірлер арасында тәжірибе алмасу, қызметшінің тәжірибесін жан-жақты жетілдіру, сыбайлас жемқорлықты анықтау мақсатында енгізілетін ротациялық төлемді енгізуді көздейді.
Қолданыстағы заңнамаға сәйкес, өзге өңірге ротацияланатын қызметкерге уақытша тұрғын үй берілуге тиіс. Алайда қызметтік пәтерлердің жетіспеушілігінен адамдар пәтерлерді өз қаражатына жалға алуға мәжбүр. Бұл көптеген жұмысшылардың ротациядан бас тартуына әкеледі. Ротациялық төлемді енгізу осы мәселені шешуге бағытталған.
Сонымен қатар, тағы бір маңызды жаңалық енгізіледі - саяси қызметкерлер сенім жоғалтқан жағдайда жұмыстан шығарылады.
Бұл жаңалық Президент әкімшілігінің тапсырмасы бойынша енгізіледі және сенім жоғалуына байланысты өз өкілеттіктерін тиісінше орындамаған саяси қызметкерді қызметтен босатуды көздейді.
Мұндай босату туралы шешімді тек Мемлекет басшысы қабылдайды.
Естеріңізге салсақ, Қазақстанда президенттің “сенімін жоғалтқан” басшыларға қатысты ереже қарастырылатыны айтылды.