Сайлау науқанына қатысуға ниет білдірген саяси партиялар Орталық сайлау комиссиясына құжаттарын тапсырып жатыр. Кеше Орталық сайлау комиссиясына «Ауыл» партиясы құжат өткізді. Тиісті құжатты ОСК аппаратының қызметкерлері қабылдады. Ал бұдан бір күн бұрын ОСК «Қазақстан Халық партиясы», «Ақ жол», «Жалпыұлттық социал-демократиялық партия», «Байтақ» партиялары құжаттарын тапсырған.

«Ауыл» партиясы Мәжіліс сайлауына 25 кандидат ұсынып отыр. Ко­мис­сия қызметкерлерінің айтуынша, ондағы жастардың үлесі талапқа сай келеді. Бұған дейін партияның екі канди­даты өткен жылы Президент сай­лауына, сондай-ақ 7 мүшесі 2021 жылы Парламент Мәжілісінің сайлауына қатысқан. Осы жолы ұсынылған 25 кан­ди­даттың 15-нің аграрлық білімі бар.
– Кандидаттар тізімі партиямыздың съезінде бекітілді. 25 үміткердің 6-ы әйел, 3 жас кандидат және инклюзивті қо­ғамның бір өкілі бар. Заңдық тұрғыдан алғанда барлық талаптарға сай келіп тұрмыз, квота 36 пайызға орындалды. Кан­ди­даттарымыздың орта жасы 43 жасты құ­райды, ең жас кандидатымыз 25 жаста. Алдағы сайлауға үмітіміз зор, талабы­мыз да жақсы. Біздің партиядан 237 адам мәжіліс депутаты болды, – деді «Ауыл» ХДП төрағасының орынбасары Анас Баққожаев.
Сондай-ақ бұған дейін орталық «Қазақстан Халық партиясы», «Ақ жол», «Жалпыұлттық социал-демократиялық партия» және «Байтақ» партияларының құжатын қабылдаған еді. «Ақ жол» партия­сының көшбасшысы Азат Перуа­шевтің айтуынша, партиядан партиялық тізім бойынша – 54, бір мандаттық округ бойынша 24 кандидат ұсынылған.
– Саяси партиялар негізі келесі сайлауға дайындықты өткен сайлаудың ертеңінен бастаулары керек. Біз осы қағиданы ұстанып, қажетті жұмысты бастап кеттік, ендігі сайлауға дайынбыз, – деді Азат Перуашев.
Азат Перуашевтің өзі партиялық тізім бойынша кандидаттыққа ұсынылып отыр және әр партия жетекшісі дәл осылай әрекет етуі тиіс деп есептейді. Бір мандатты округ бойынша «Ақ жолдан» үміткерлер арасында Ақмола облысынан Меруерт Қазбекова және Павлодар облысынан Фуат Сатыбаев секілді БАҚ өкілдері де бар. Партиялық тізімде жас кәсіпкерлер де табылды, ең жасы 25-тен енді асқан.
– Әрине, біз тәжірибелі депутат ретінде саяси аренада өзін танытып үлгергендерді ғана ұсынбаймыз. Мін­детіміз – жаңа көшбасшыларды жетелеу, сондықтан жаңа тұлғалардың саны айтарлықтай көп болады. Жалпы, жастарды дәріптеп жатқанымыз – жеке қалауым ғана емес, заң талаптарына да сай келіп тұр. Біз жастарға, әйелдерге және мүгедектерге арналған 30 пайыздық квотаны толық орындап тұрмыз. Айта кету керек, бұл квота 5 және 6-шақырылымдарда енгізілгенге дейін Мәжілістегі «Ақ жол» фракциясының 40 пайызға жуығын әйелдер құрады, – деді партия жетекшісі.
Сонымен қатар «Жалпыұлттық социал-демократиялық партия» атынан құжаттарды Орталық сайлау комиссиясына партияның саяси бірлестігі орталық аппаратының жетекшісі Талғат Омаров тапсырды.
– Біз ЖСДП-дан Мәжіліске канди­дат­тардың тізімін саналы түрде түздік, бар­лығы – 19 адам. Мажоритарлық жүйе бойынша сайлауға алты кандидат – Атырау, Қостанай, Қызылорда, Павло­дар, Ақмола облыстары мен Алматы қала­сынан қатысады. Олар құжаттарды учас­келік комиссияларға тапсырды, – деді ол.
Талғат Омаров ЖСДП ауыл тұрғын­дары­ның мәселелерін көтеріп, бұл сұрақ­тарды шешуге бар күш-жігерін салып жат­қанын атап өтті. Айтуынша ауыл тұр­ғын­дары Парламент деңгейінде шешуді қажет ететін мәселелер бар екенін түсінеді. Сондықтан құрамында танымал тұлғалары бар партия сайлаушылардың қолдауына үміт артады. Сондай-ақ ол өткен сайлауларға қатыспауының себебін айтып өтті.
– Партияның өткен сайлауға қатысу­дан бас тартуының басты себебі – сайлау заң­намасының жетілдіріл­меген­дігі. Біз­де сенімсіздік болды, өйт­кені сайлау учас­келерінің барлық хат­та­маларын жария­лау туралы ұсыны­сымыз еленбеді. Қазір өзгерістер енгізілді, әрине, біз қала­ғандай емес. Бірақ заңнамада әлі де ши­кілік бар, одан әрі жетілетініне үміт­тенеміз. Ал біз Парламентте өкілдік етсек, бұл үшін бар күшімізді саламыз. Онда электоратымыздың мүддесін білдіру үшін күресетін боламыз, – деді ЖСДП өкілі.
Ал «Байтақ» жасылдар партиясының үміткерлер тізімін ұйым төрағасы Азаматхан Әміртай тапсырды. Мәжіліс сайлауына кандидаттардың 18-і – партиялық тізім, төртеуі бір мандатты округтер бойынша қатысады. «Байтақтың» саяси бірлестік ретінде құрылғанына екі ай ғана болғанымен, «жасылдар» 2015 жылдан бері белсенді жұмыс істеп келеді. Олар басты назарды Арал, Семей, Қазақстанның батысындағы жер қойнауын пайдалану қалдықтары проблемасын шешуге аударып келеді. «Байтақ» партиясы көмірқышқыл газының нөлдік шығындыларына қол жеткізу үшін үлкен күш салуды жоспарлап отыр. Азаматхан Әміртай бастапқыда 43 партия мүшесінің тізімі қаралғанын айтты. Бірақ соңында олар тек 18-ін қалдыруды ұйғарған.
– Негізгі мәселе – қаржыландыру, сондықтан шығындарды азайту туралы шешім қабылданды. Соңғы жеті жылда партияны өз қаражатымнан қаржы­ландырдым. Осы күнге дейін демеуші таппадық, мемлекет ақшасына қол жеткізбедік. Өзім Астана қаласындағы бір мандатты округтен Мәжіліс сайлауына қатысамын, құжаттарымды тапсырып қойдым, – деді Азаматхан Әміртай.
Айта кетейік, партияның үміткерлері Қызылорда, Түркістан облыстары, Алматы және Астана қалаларындағы бір мандатты сайлау округтері бойынша да ұсынылып жатыр.