Өскен өңір Osken-onir.kz ақпараттық агенттігі
» » КАРАНТИН ТАҒЫ 2 АПТАҒА СОЗЫЛДЫ

КАРАНТИН ТАҒЫ 2 АПТАҒА СОЗЫЛДЫ

Ай басында енгізілген шектеу шараларының оң әсерін одан әрі арттыру мақсатында, сондай-ақ Қазақстандағы және шекаралас мемлекеттердегі эпидемиологиялық жағдайдың күрделене түсу ықтималдығын ескере отырып, елдегі карантин тағы да екі аптаға созылатын болды.
Бұл туралы Мемлекет басшысы еліміздегі эпидемиологиялық ахуалға қатысты түйткілді мәселелер жөнінде өткізген кеңесте айтты. Жиында Қасым-Жомарт Тоқаев Мемлекеттік комиссияға карантин шараларын кезең-кезеңімен жеңілдету арқылы екі аптаға ұзартуды тапсырды.
Премьер-Министр Асқар Мамин Президентке 5 шілдеден бастап елімізде қатаң карантин шаралары енгізілгеннен кейін індет жұқтырушылардың саны 29 процентке төмендегенін баяндады. Бір күнде індет жұқтыратын адамдардың саны 1500-1600 аралығында тұрақтаған. Стационарлардағы емделушілердің қатары 43 процентке, оның ішінде реанимациялық палаталардағы науқастар саны 27 процентке азайған. Сауығып шыққандардың саны 63 процентке дейін өскен. Жедел-жәрдем шақыру жағдайы төмендеген. Осылайша денсаулық сақтау жүйесінің негізгі жүктеме көрсеткішін төмендетуге қол жеткізілген.
Сонымен қатар Асқар Мамин Қасым-Жомарт Тоқаевқа дертке шалдығу және адам өлімі, медициналық көмектің қол жетімділігі мен сапасы, халықтан тест сынамасын алу деңгейі, интенсивті терапия және реанимация палаталарының қажетті дәрі-дәрмектермен, медициналық құрал-жабдықтармен қамтамасыз етілуі секілді негізгі көрсеткіштер бойынша өңірлердегі ахуалға жүргізілген күнделікті мониторинг жайында мәлімет берді.
Денсаулық сақтау министрі Алексей Цой Мемлекет басшысына инфрақұрылым нысандарының эпидемиологиялық ахуалға және экономикаға әсерін ескере отырып, карантин шараларын кезең-кезеңімен жеңілдету жолдарын баяндады.
Мемлекет басшысы коронавирус індетіне шалдығушылардың және соның салдарынан болатын өлім-жітімнің көрсеткішін одан әрі төмендетудің аса маңызды екенін атап өтті.
Айта кетейік, карантиннің 2 аптаға созылуына байланысты табысынан айырылған тұрғындарға 42 500 теңгенің жартысы, яғни 21 250 теңге төленеді. Бұл туралы Премьер-министрдің орынбасары Ералы Тоғжанов мәлімдеді.

Гүлхан ЯХИЯ

03 тамыз 2020 ж. 344 0