Қазақстан футбол тарихында тұңғыш рет жаңа маусым қарсаңында отандық клубтардың қатысуымен өтетін турнирге қомақты көлемде қаражат тігі­леді.





Аталған жарыс 17-21 ақпан аралығында Түркияның Билек қаласындағы «Титаник Делюкс» стадионында ұйымдастырылады. Жүлде қоры 100 млн теңгені құрайтын турнирде Шымкенттің «Ордабасы», Қостанайдың «Тобыл», Семейдің «Елімай» және «Ақтөбе» клубтары шеберлік байқасады. Бас жүлде алған команда 60 млн-ды олжаласа, финалда ұтылған ұжым 40 млн-ды еншілейді.
Ел чемпионы «Ордабасы» мен Бірінші лиганың жеңімпазы «Елімай» арасындағы кездесу турнирдің шымылдығын ашады. Одан кейін премьер-лиганың қола жүлдегері «Ақтөбе» Қазақстан кубогінің иегері «Тобылмен» күш сынасады. Жартылай финал 17 ақпанда Астана уақыты бойынша сағат 15.00-де өтсе, финалдық сайысты сол күні 20.00-де тамашалаймыз.