GGG – бесінші орында
Әйгілі BoxRec порталы P4P жүйесі бойынша әлемнің ең үздік кәсіпқой боксшыларын анықтады. Үздіктер тізімінде орта салмақта WBA Super нұсқасы бойынша чемпиондық белбеуді иеленіп отырған еліміздің мақтанышы Геннадий Головкин де бар. Біздің Гена бұл рейтингте бесінші орынды еншіледі.
Көш басында – Сауль Альварес. Әрине, бұған таңдануға болмайды. Өйткені Мексиканың марқасқасы екінші орта салмақта абсолютті әлем чемпионы атанып отыр. 17 жыл бойы кәсіпқой рингте жұдырықтасып жүрген 32 жастағы Канело 62 кездесу өткізіп, соның 58-інде жеңіске жетті. Екі рет ұтылып, екі бәсекені тең аяқтады. Ол тек осыдан 10 жыл бұрын Флойд Мейвезерден, ал былтыр Дмитрий Биволдан ұпай санымен ұтылды. Дәл осы Альварес 2017-2022 жылдар аралығында GGG-мен үш мәрте жұдырықтасып, екі ретінде жеңіске жеткен еді. Тағы бір бәсекеде жеңімпаз анықталған жоқ.
Екінші орынды Тайсон Фьюри иеленуде. Аса ауыр салмақтағы WBC нұсқасының чемпиондық белбеуін иеленіп отырған 35 жастағы Ұлыбританияның алыбы осы спорт түрін серік еткелі 18 жылға жуықтады. Сол аралықта 34 рет айқасып, бірде-бір жекпе-жекте жеңілген жоқ. 24 қарсыласын нокаутқа жіберді. Ол тек 2018 жылы Деонтей Уайлдермен тең түсті. Бірақ кейіннен дәл сол АҚШ боксшысын Фьюри екі рет оңдырмай сабады. Биыл 29 сәуірде «Сыған патшасы» Александр Усикпен айқасады. Дәл осы жекпе-жекте алыптар арасындағы әлемнің абсолютті чемпионы анықталады.
Үшінші сатыға Дмитрий Бивол жайғасты. Қырғызстанда туып-өсіп, кейіннен Ресейге қоныс аударған ол – жартылай ауыр салмақта WBА-ның суперчемпионы. 32 жастағы Тоқмақтың тумасы былтыр Сауль Альварестен айласын асырып, жер-жаһан жанкүйерлерінің қошеметіне бөленді. Одан кейін Хильберто Рамиресті ұтып, сол жеңісінің кездейсоқ еместігін дәлелдеді. 2014 жылдан бері Бивол 21 рет шаршы алаңға шығып, барлық қарсыласынан басым түсті. 11 кездесуді ол мерзімнен бұрын аяқтады.
Сондай-ақ ТОП-10 кәсіпқой боксшының қатарында Теренс Кроуфорд (АҚШ), Геннадий Головкин (Қазақстан), Александр Усик (Украина), Энтони Джошуа (Ұлыбритания), Наоя Иноуэ (Жапония), Эррол Спенс (АҚШ), Лиам Смит (Ұлыбритания) сынды саңлақтар бар.
