Спортшылардың қарқынын байқасаңыз, биыл толайым табыс күтіп тұрғандай. Блиц шахматтан екі дүркін әлем чемпионы Бибісара Асау­баева рапидте бәсекенің басты фавориті Сергей Карякинді жеңіп бір қуантты. Дзюдодан ел тарихында болмаған нә­тижеге қол жеткіздік. Хоккейші қыздар жасөспірімдер арасындағы әлем чемпиона­тында сәтті өнер көрсетіп жатқаны тағы бар.



Жас боксшылар жарап тұр
Боксшылар қоян жылын сәтті бастады. Құрама саңлақтары Тайландта өткен жастар арасындағы Азия чемпионатында 20 жүлде ұтып алды. 18-27 қаңтар аралығында өткен бә­секеге әлемнің 21 елінен 243 спортшы қатысты.
22 жасқа дейінгі боксшылар сынға түскен додада қыздар арасынан 70 келіге дейінгі салмақта Жасмин Кизатова мен 81 келіге дейінгі салмақта Гүлсая Ержан топ жарды. Одан бөлек, Мөлдір Тойкова (50 кг), Әнел Сақыш (54 кг), Виктория Графеева (57 кг), Шахназ Исаева (60 кг), Назерке Серік (63 кг), Ақнар Ишанова (66 кг), Дана Дидай (75 кг) қола медаль еншіледі. Жалпы есепте қыз­дарымыз екі алтын, жеті қолаға қол жеткізді.
Жігіттерге келсек, Санжар Тәшкенбай (48 кг), Нұрсұлтан Алтынбек (54 кг) пен Махмуд Сабыржан (57 кг) чемпион атанды. Абзал Серік (67 кг), Сабыржан Аққалыков (71 кг), Диас Молжігітов (75 кг) күміс медаль қанжы­ғалады. Талғат Сырымбетов (60 кг), Мұхаммед­сабыр Базарбайұлы (63,5 кг), Ер­асыл Жакпеков (80 кг), Ерхат Бекзат (92 кг), Аманат Сабырғали (92 келіден жоғары) қола жүлдеге ілікті. Осылайша, ерлер он бір медаль олжалап, үш алтын, үш күміс, бес қола жүлде алды. Бірін­шілік қорытындысы бо­йын­ша ұлттық құрама Бірін­шілік қорытынды­сында ұлттық құрама 20 медаль­мен (5 алтын, 3 күміс, 12 қола) екінші орынға жайғасты. Жүлде кесте­сінде Өзбекстан боксшылары 21 медальмен (14 алтын, 4 күміс, 3 қола) көш бас­тады. Үздік үштікті Тайланд құрамасы (3 ал­тын, 4 күміс, 2 қола) түйіндеді.

«Бізді қолдаған барлық жанкүйерге зор алғыс айтамын. Біз үшін уайымдап, жеңіс тілегендеріңізді жақсы білеміз. Бангкоктағы додаға келетін болсақ, мен ол жерде 57 келіге дейінгі салмақта сынға түстім. Бұл Олимпиада бағдарламасына кіретін салмақ. Енді ауыс­қандықтан қиындау болды. Соған қарамастан, жақсы нəтиже көрсеттім деп ойлаймын. Мақ­сат баяғыдай – Олимпиада алтынын жеңіп алу», – деді Ұлттық құрама көшбасшысының бірі Махмұд Сабырхан.

Айта кетерлігі, боксшылар үшін биылғы басты бәсеке – Ташкенттегі әлем чемпионаты мен Қытайда өтетін жазғы Азия ойындары. Федерация басшылығы спортшылардың аталған сынға тас түйін дайындалатынын атап өткен.

Жанкүйерін жылатқан қыздар
27-29 қаңтар күндері Португалияның Алмада қаласында дзюдодан жылдың беташар жарысы өтті. Аталған додаға 81 елден 500-ден астам дзюдошы бақ сынады. Жаңа құрама Гран-при бәсекесін үш медальмен аяқтады. Соның ішінде ерлер арасында 73 келіге дейінгі салмақта белдескен Жансай Смағұлов турнирдің күміс жүлдесіне ие болды. Смағұлов жарысты екінші айналымнан бастады. Өз тобында әуелі Олоф Хермодссонды (Швеция), сосын Владислав Казимировты (Украина) жеңді. Ширек финалда Йерун Касседен (Бельгия) басым түсіп, жартылай финалда Хосе Антонио Арандадан (Испания) айласын асырды. Ал финалда өзбек балуаны Обидхон Номановқа есе жіберді. Ескерерлігі, Жансай жара­қатына байланысты өткен маусымды өткізіп алған еді. Спортшы үшін жаңа маусым­ды күміспен бастау ты­нық­қанының әрі тыңнан түрен са­луға дайын екенін білдіретіндей.
Ал 48 келіге де­йінгі қыздар ара­сындағы тартыс жанкүйер­лерге қос қуа­ныш сый­лады. Өйткені мұн­дай финал ел тари­хында бұрын-соңды болмаған. Әбиба Әбу­жақын­ова мен Ғалия Тын­баева Алмада та­тамиінде финалда күресті. Нә­тижесінде, Әбиба Гран-при жеңім­пазы, Ғалия Тынбаева күміс жүлдегер атанды. Айта кетерлігі, аталған салмақ дәрежесінде 19 балуан бақ сынаса, финалда Әби­ба мен Ғалия жолықты. Әбу­жақынова вазари ұпайымен чемпион атанды.


Белдесу аяқтала салысымен, тата­миде бір-біріне қол созған қыздарға бү­кіл әлем тәнті болды. Төреші жеңім­пазды хабарлар тұста Әбибаның Ғалия­ның да қолын бірге көтеріп, кеуде тұсындағы Қазақстан Туын көрсеткен сәті жү­рек тебірентеді. Осылайша, Пор­ту­галия көгінде көк Туымыз қатар желбіреп, мерейі­міз үстем болды. Атал­ған салмақта Ришони Шира (Израиль) мен Лапуерта Комас Ми­рейа (Ис­пания) қола жүлде алды.

Теннистегі тосынсый
Қазақстанның бірінші, әлем­нің 25-ракет­касы Елена Рыбакина Аустралия ашық чемпионаты финалында қарсыласына жол берді. Дүниежүзілік рейтиңде 5-орында тұрған Беларусь теннисшісі Арина Соболенко турнир жеңімпазы атанды.
Мельбрунда өткен қос мықтының айқасы 6:4, 3:6, 4:6 есебімен белорус теннисшісінің пайдасына шешілді. Бас-аяғы 2,5 сағатқа созылған тартысты бәсеке барысында Рыба­кина 9 брейк жасап, 6 брейк-пойнттың екеуін пайдаланды. Қарсыласы 17 эйс, 3 брейкпен (13 брейк-пойнт) көзге түсті.
Жарыс қорытындысы бойынша отан­дасымыз рейтинг бойынша 1 300 ұпайға ие болды. Бұл ұпай оған әлемдік рейтингте 10 орынға көтерілуге көмектесті. Оған қоса, Елена жекелей және жұптық сынды қоса есеп­тегенде, «Үлкен дулыға» турнирінде 1 млн 143,5 мың АҚШ доллары көлемінде табыс тап­ты.

«Мен Еленаға жоғары деңгейде өнер көрсеткені үшін ризашылығымды білдіремін. Бұл – елімізде теннистің табысты дамып келе жатқанының көрінісі. Australian Open фина­лына дейін жету – шеберлік пен тұрақтылықтың белгісі. Дода барысында Елена әлемдік рейтингінің көшбасшысы Ига Швентекті, басқа да мықтыларды тізе бүктірді. Олардың үшеуі – «Үлкен дулыға» турнирінің жеңімпазы. Еленаның түрлі төсеніштегі корттарда өзін еркін сезініп, қарсыласына байланысты тактикасын сауатты құратыны, өз ойынын үнемі жетілдіріп келе жатқаны айқын көрініп тұр. Жылдың сәтті басталуы алдағы жеңістерге жол ашады деп үміттенемін», – деді федерация президенті Б. Өтемұратов.

Талайдың кеудесіне үміт отын жаққан Елена Рыбакина енді Дубайда өтетін жарысқа дайындалады. Оның аталған турнирдегі ойын мәнерін мақтаған сарапшылар жетерлік. Отандасымыздың болашағынан үміт күтетін­дер көп. Теннистің басты сайыстарында қаты­су­шылар үрке қарайтындай тұлғаға айналғаны сөзсіз.
Тағы бір теннисшіміз Тимофей Скатов әлемдік рейтингте алға жылжыды. Ол Чилидегі челленджер жарысының финалына дейін жеткені үшін 144-тен 129-сатыға көтерілді. Скатов үшін келесі меже – үздік жүздікке кіру. Теннисшіміз аталған доданың финалында аргентиналық Федерико Кориаға жол берді. «Челленджер» турнирінде қарсыластарынан оқ бойы оза шапқан ол финалда Кориадан 4:6, 6:3 есебімен жеңілді.
Ал Теннис федерациясынан мәліметінше, Кәсіби теннисшілер қауымдастығы (ATP) жария еткен жаңартылған рейтингте Александр Бублик 36-орнында қалды. Бейбіт Жукаев 170-тен 168-ге ауысса, Михаил Кукушкин, Денис Евсеев, Дмитрий Попконың рейтингтегі жағдайы нашарлап кеткен. Жұптық сында Андрей Голубев 49-дан 48-ге жоғарыласа, Александр Недовесов 59-дан 65-ке сырғыды.
Жібек Құламбаева мен Гөзал Айнитдинова жұптық сында Үндістанның Пуна қаласында өтіп жатқан ITF W40 турнирінде бақ сынады. Олар финалда доданың 1-ракеткалары, үндіс­тандық Анкита Райна – Прантхана Тхом­баремен жолығып, 4:6, 5:7, 8:10 есебімен ұты­лып қалды. Жекелей сынға келсек, Жібек Құ­лам­баева аталған турнирді 1/8 финалмен аяқтады.
Қуантарлығы, ITF Juniors турнирінде Заң­ғар Нұрланұлы алғаш рет чемпион атанды. Бәсеке Словакияның Трнава қаласында 18 жасқа дейінгі ойыншылар өткен-ді. 14 жастағы теннисшіміз финалда жергілікті Даниэл Балашекті 6:4, 3:6, 6:2 есебімен тізе бүктірді.

«Барлық матч өте қиын болды. Дегенмен жекелей сында ITF Juniors додасында алғашқы титулымды жеңіп алғаныма қуаныштымын. Бұл – мен үшін маңызды», – деді ол.

Ол былтыр Tennis Europe рейтингісінде үздік ондыққа еніп, ұзақ уақыт бойы чемпион­ дық кестеде көш бастады. Өткен жылдың желтоқсанынан бері Заңғар жоғары санатқа ауысып, қазір ITF Juniors турнирлерінде өнер көрсетіп жүр.

Айзат АЙДАРҚЫЗЫ