Талдықорғандағы Салтанат сарайында кезекті салтанатты шара өтті. Қалыптасқан дәстүрге сай өткен жылдың қорытын­дысы бойынша үздік деп танылған спортшылар мен жат­тықтырушылар және спорт журналистері марапатталды.
Шара басталар алдында жи­налғандар назарына өңірдегі дене тәрбиесі мен спорт саласы­ның дамуын баяндайтын деректі фильм ұсынылды. Одан кейін спорт саласының сайыпқыран­дарын Алматы облысының әкімі Амандық Баталов құттықтады.
Жалпы, ел спортында жетісу­лықтардың алатын орны ерекше. Жекпе-жек спорт түрлерімен бірге командалық ойындарда да біршама жетістіктеріміз бар. Волейболдан қыздарымыз ел құрамасының негізін құраса, гандбол мен регбиде, көгалдағы хоккейде де біраз биіктерді бағындырдық. Футболшыла­рымыз бір жылдық үзілістен соң премьер-лигаға қайта оралды. Қазақтың оң жамбасына келетін бокс, күрес сияқты жекпе-жек спорт түрлерінен әзірге ешкімге дес бере қоймасымыз анық. Со­ның арқасы болар, өткен жылы жетісулық спортшылар рес­пуб­ликалық, халықаралық жа­рыс­тарда барлығы 1345 жүлдеге қол жеткізсе, оның ішінде 495 ал­тын, 372 күміс және 478 қола медаль бар. Осы кезеңде 18 халықаралық дәрежедегі спорт шебері, 132 спорт шебері, 698 спорт шебер­лігінен үміткер және 381 бірінші разрядты спортшы дайында­лыпты. Былтыр «Жетісу» футбол клубы, «Бесарыс» көгалдағы хоккей клубы ел чемпионаты мен халықаралық турнирлерде табысты өнер көрсетті. Өткен жылдың екінші жартыжыл­дығында «Мүгедектерге арналған облыстық мамандандырылған спорт мектебі» КММ ретінде қайта құрылған облыстық спорт клубының спортшы-параолим­пиадашылары да жетістіктерімен қуантты.
Бірінші кезекте жыл қоры­тындысында алдан көрінген спорттық мекемелерге құрмет көрсетілді. Одан кейін үздік спортшылар мен жаттық­тыру­шылар, Жетісу жерінің спортын насихаттап жүрген журналистер мен блогерлер ақшалай сый­лықтармен және дипломдармен марапатталды.
Болат АБАҒАН, 
Алматы облысы