18-28 сәуір аралығында Қытайдың Нинбо қаласында ауыр атлетикадан Азия чемпионаты өтеді. Сары құрлықтың басты додасында қазақстандық ауыр атлеттер де жүлдеге таласады.

Азия чемпионаты 2020 жылғы Олимпиада ойындарына іріктеу кезеңі аясындағы жарыстар қатарына енеді. Сондықтан да қазақстандық кіл мықты ауыр атлеттер бұл жарыста бақ сынайды. Қазіргі таңда кімдер баратыны анықталып үлгерген. Бұл туралы ұлттық құраманың бас жаттықтырушысы Юрий Мельников olympic.kz сайтына берген сұқбатында айта кетті.
Қазақстан құрамасы Азия чемпионатына Ресейдің Сочи қаласында бір ай дайындалды. Көрші елдің спортшыларымен бірге жаттығу жасап, тәжірибе алмасты. Ал қазір Шымкенттегі "БИІК" спорт кешенінде жаттығуларын жалғастыруда екен.
Нинбода өтетін Азия чемпионатына кіл мықты ауыр атлеттер қатысатыны жайлы айта кеттік. Енді атап айтар болсақ, олардың қатарында Олимпиада чемпионы Нижат Рахимов, Олимпиада жүлдегері Денис Уланов пен Жазира Жапарқұл бар. Сондай-ақ, Илья Ильин мен Зүлфия Чиншанло да бақ сынайды.
Азия чемпионатына баратын ұлттық құрама тізімі:
Ерлер
Арлей Чонтей (55 кг)
Фархад Харки (67 кг)
Денис Уланов, Нұржан Сәменов (81 кг)
Нижат Рахимов (89 кг)
Илья Ильин, Рустам Сыбай (96 кг)
Александр Зайчиков, Ибрагим Берсанов, Селімхан Абубакиров (109 кг).
Қыздар
Зүлфия Чиншанло (55 кг)
Карина Горичева (64 кг)
Екатерина Столяренко, Екатерина Быкова (71 кг)
Жазира Жапарқұл (76 кг)
Раушан Мешітханова (81 кг)
Лариса Кобелева (87 кг)
Айзада Мүфтілда (+87 кг).
Азия чемпионатында Илья Ильин 96 килода бақ сынайды.
Рио Олимпиадасынан кейін ешбір жарысқа қатыспаған Жазира Жаппарқұл үшін де бұл жарыстың маңызы жоғары болмақ. Юрий Мельников olympic.kz сайтына берген сұқбатында екі спортшы жайлы тарқата айта кеткен.
- Ильин 96 келіге қайта оралды. Өйткені, басқа таңдау жоқ. Олимпиадалық салмақ дәрежесіне 96 және 109 келі енеді. Ильин 96 келіде бақ сынауды жөн көрді. Ал Жазира Жапарқұл Рио Олимпиадасынан кейін ешқандай жарысқа қатысқан жоқ. Жақында ғана құрамаға оралып, Сочидегі жаттығу жиынына қатысты. Әзірге, Жазираға қатысты ештеңе айта алмаймын. Оның құрлық додасында жүлдеге таласпайтыны анық. Бірақ осы турнирден қалып қойса, келесі Олимпиадаға жолдама алу туралы ұмытуға болады. Сол себепті, оған Азия чемпионатына міндетті түрде қатысып, ұпай жинау керек. Бұл Ильинге де қатысты. Егер Токио ойындарына қатысатын болса, Азия чемпионатында міндетті түрде сынға түсуі тиіс, - деген.
Айта кетейік, осыған дейін ауыр атлеттердің Олимпиада ойындарына қатысуы – сол ел ұлттық құрамасының халықаралық жарыстардағы нәтижесіне байланысты еді. Жаңа жүйе бойынша ауыр атлеттер төртжылдықтың басты додасына жекелей көрсеткіштері бойынша жолдама алады. Олар осындай лицензиялық турнирлерде бақ сынап, ұпай алулары тиіс. Сондай-ақ, енді Олимпиада ойындарына лицензияны кім ұтып алса, сол ғана қатысады. Жаттықтырушылардың оның орнына басқа спортшыны жіберуге құқығы жоқ.
massaget.kz