Түркияның 24 провинциясы мен аудандарына мектептер мен жоғарғы оқу орындары уақытша жұмысын тоқтатты. Бұған елдегі күні бойы жауған қар себеп болып отыр. Осының салдарынан, жергілікті билік бірқатар қала орталықтары мен шалғай аудандарындағы мемлекеттік мекемелерге демалыс жариялады. Түрік елі үшін бұл үйреншікті жағдай. Жылда қыс маусымында қалың қар түскен уақытта бірнеше күн бірқатар мемлекеттік мекемелер жұмысын уақытша тоқтатып тұрады. Түркияның географиялық орналасуы да қарды дер кезінде тазалауға ыңғайсыз. Жергілікті әкімшіліктің айтуынша, бұл жағдай халықтың қауіпсіздігін сақтау және жұқпалы аурулардың алдын алу үшін қабылданады. Хажали Южел, Анкара тұрғыны: - Анкара қаласының биікте орналасуы және халық саны көп болуына байланысты қар түскен кезде уақытша жұмысын тоқтатады. Жергілікті билік мұны халықтың қауіпсіздігі мен балалардың жаппай ауруға шалдықпауы үшін жасайды. Біз үшін бұл үйреншікті жағдай. Мысалы, бүгін жұмыстан сұрануға тура келді. Себебі туған-туыстарымыз басқа қалаларда. Мектептерге демалыс. Балаларға қарайтын ешкім жоқ.
www.24.kz