ҚазАқпарат - Қызылорда облысы Шиелі ауданының Ыбырай Жақаев ауылында табиғи газ жүргізілді, деп хабарлайды ҚазАқпарат. ҰҚСАС ЖАҢАЛЫҚТАР Қазақстанда газдандырылған кәсіпорындар саны 86% өсті Соңғы бес жылда 3 миллионнан астам қазақстандық газға қосылды Жамбыл облысы: Үйге газ тарту 83 мың теңгеге дейін төмендеді Облысы әкімі баспасөз қызметінің хабарлауынша, Шиелі ауданының Ы.Жақаев және Бидайкөл елдімекендері көгілдір отынға қосылды. Қазіргі уақытта үйлерге газ жүргізу туралы келісімшарт жасалып жатыр. «Мемлекет басшысының қолдауымен басталған ірі стратегиялық маңызы бар - «Бейнеу-Бозой-Шымкент» магистралды газ құбыры Сыр еліне сәтті мүмкіндік берді. Олай дейтінім, облыс аумағынан өтетін 846 шақырымдық газ құбыры Қызылорда облысын газдандыруға жол ашты. Бұл Арал, Қазалы, Шиелі, Жаңақорған аудан орталықтарын және өткен жылы Байқоңыр қаласын газдандыруға мүмкіндік берді. Міне, енді кент орталығынан бөлек ауылдық елдімекендерді де газдандыру жұмыстары жүргізілуде», - деді облыс әкімі Қырымбек Көшербаев. Ыбырай Жақаев ауылының тұрғыны Құралбек Әуелбеков алғашқылардың бірі болып үйіне газ жүргізді. «Біз табиғи газ жүргізілгеніне қуаныштымыз. Енді пешті қолмен жағып, отын сатып алудың қажеті жоқ. Сонымен қатар, үйді газбен жылыту әр қыс сайын сатып алатын көмірге қарағанда әлдеқайда тиімді болады. Қазірдің өзінде үйіміз жылынып, жайлы көрінеді»,  - дейді Құралбектің жұбайы Ләззат Пәрменқұлова. Биыл қалған 3 аудан орталығына - Жосалы, Тереңөзек және Жалағаш кенті көгілдір отынға қосылса, ал 2019 жылы кентішілік газ желілерінің құрылысы басталады. Бүгінде облыс халқының 63%-ы табиғи газбен қамтамасыз етілді, 2020 жылға қарай 95-ке дейін жеткізу міндеті қойылып отыр. Еске сала кетсек, Елбасының «Президенттің 5 әлеуметтік бастамасы» атты бағдарламасында елді газбен қамтамасыз етуді жалғастырутапсырылған болатын.

inform.kz