БАЛА ҚАУІПСІЗДІГІ – БАСТЫ МАҚСАТЫМЫЗ

Бала — ел болашағы, ұлттың ертеңі. Сондықтан әрбір ата-ана мен қоғам мүшесінің басты міндеті — балалардың қауіпсіздігін қамтамасыз ету. Қазіргі таңда тұрмыстық жағдайлар, жол қозғалысы, су айдындары, интернет кеңістігі және өрт қауіпсіздігі сияқты түрлі қауіп-қатерлер балалар өміріне қауіп төндіруде. Осындай жағдайлардың алдын алу үшін қауіпсіздік ережелерін сақтау аса маңызды. Балалардың қауіпсіздігі ең алдымен отбасынан басталады. Үй ішінде электр құралдарын дұрыс пайдалану, өткір заттарды балалардың қолы жетпейтін жерге қою, терезелерге арнайы қорғаныш орнату — қайғылы жағдайлардың алдын алады. Әсіресе кішкентай балаларды қараусыз қалдырмау қажет. Жаз мезгілінде судағы қауіпсіздік мәселесіне ерекше назар аудару керек. Балалар тек арнайы рұқсат етілген орындарда және үлкендердің бақылауымен ғана суға түсуі тиіс. Белгіленбеген жерлерде шомылу адам өміріне өте қауіпті. Сонымен қатар жолдағы қауіпсіздік те маңызды. Балаларға жолдан өту ережелерін үйретіп, бағдаршам белгілерін түсіндіру қажет. Велосипед пен самокат тепкен кезде қорғаныш құралдарын пайдалану да қауіпсіздіктің маңызды бөлігі болып табылады.
Бүгінде интернет қауіпсіздігі де өзекті мәселеге айналды. Балаларға бейтаныс адамдармен сөйлеспеу, жеке мәліметтерді жарияламау және зиянды ақпараттардан сақ болу туралы түсіндіру қажет. Өрт қауіпсіздігі ережелерін сақтау да балалар өмірін қорғауға көмектеседі. Сіріңке мен оттықты балалардың қолына бермеу, газ және электр құрылғыларын қараусыз қалдырмау — әр отбасының міндеті. Қауіпсіздік — бұл тек ереже емес, ол — адам өмірін сақтайтын маңызды қағида. Балалардың амандығы мен жарқын болашағы үшін әрбір азамат қауіпсіздік талаптарын сақтауға жауапкершілікпен қарауы қажет. Бала қауіпсіздігі — баршамыздың ортақ міндетіміз!


Шиелі ауданы
Төтенше жағдайлар бөлімінің бас маманы
Нұрмантаев Әділет Баяхметұлы