Қыстың соңғы айы қыңыр мінез танытып, күн райы күрт құбылды. Бір апта бұрын ғана мамыражай тұрған аспан кенеттен түнеріп, нөсерлетіп жаңбыр жауды. Жауын аралас қар да сіркіреп, жер-дүниені дымқыл тынысқа бөледі. Ауадағы ылғал мөлшері бірнеше есеге артты. Көктемнің лебі сезілгенімен, табиғаттың бұл тосын мінезі жұртшылықты әбігерге салды. Себебі жауын – бір жағынан ырыс, екінші жағынан инфрақұрылымның әлсіз тұсын көрсететін сынақ.
Көктемгі жауын – тіршіліктің тамырына қан жүгіртетін құт. Диқан үшін – мол өнімнің кепілі, малшы үшін – шүйгін шөптің бастауы. Алайда сол жауын кент көшелерін көлшікке айналдырып, тұрғындардың күнделікті өміріне кедергі келтірсе, ол берекеден гөрі бейберекеттің белгісіне айналмай ма?

Осыдан 2 жыл бұрын басылым бетінде аудан көшелеріндегі осы мәселе көтерілген еді. Сол кезде-ақ жаңбыр жауса болды, орталықтағы Рысқұлов, Абылай хан, әл Фараби, Байтұрсынов, Дәулеткерей көшелерінің ойпаң тұстары суға толып, жаяу жүргінші түгілі, көлік қозғалысы қиындайтыны айтылған. Бір сағаттық нөсердің өзі көшелерді айнадай жарқыраған көлшікке айналдырып, жұртты әуреге салатын. Бұл – кездейсоқтық емес, жүйелі мәселе екені белгілі болатын.

Биылғы толассыз жауын сол түйткілдің қайта бас көтеретінін аңғартқандай еді. Шынында да, нөсерден кейін кент ішінде кептеліс туындап, жол жиегі суға толып, тұрғындар көшеден өту үшін амал іздегені жасырын емес. Әсіресе оқушылар мен қарттар үшін бұл үлкен қиындық. Көлшік кешіп мектепке бару – өркениетті қоғамға тән көрініс емес.

Дегенмен, бұл жолы жауапты мекемелердің жедел әрекеті байқалды. Таңғы уақытта-ақ су тартқыш техникалар іске қосылып, орталық көшелердегі жиналған су дер кезінде сорылып алынды. Рысқұлов пен Абылай хан көшелерінің қиылысы қысқа уақыт ішінде тазартылды. Бұл – тек техникалық шара ғана емес, ұйымдасқан жұмыстың көрінісі. Әлеуметтік маңызы бар нысандарға басымдық беріліп, мектептер мен мекемелер маңы ретке келтірілді.

Шиелі ауданында жауын-шашын салдарын жою жұмыстары күшейтілген режимде жүргізіліп жатқаны байқалады. Арнайы техника жұмылдырылып, арық-атыз жүйелері ашылып, су жүретін өткелдер тазартылуда. Қажет тұстарға инертті материалдар төселіп, жол жабындысын сақтау шаралары қолға алынған. Коммуналдық қызмет мекемелері тәулік бойы кезекшілік ұйымдастырып, ауа райы болжамына сәйкес алдын алу жұмыстарын да жүргізді.

Әрине, бұл – құптарлық іс. Алайда мәселенің түп-тамыры тек салдарды жоюда емес, себепті жоюда жатыр. Көшелердің суға толуы – арық жүйесінің жеткіліксіздігі ме, әлде жол құрылысы кезінде табиғи еңістердің ескерілмеуі ме? Жаңбыр суын бұру арналарының жобасы заман талабына сай ма? Бұл сауалдар уақытша шешіммен емес, кешенді инфрақұрылымдық жоспармен жауап табуы тиіс.

Өйткені жауын – жыл сайын қайталанатын табиғи құбылыс. Ал оған дайындық – жүйелі саясаттың өлшемі. Егер әр нөсер сайын техника шығарып, су сорумен шектелсек, бұл мәселе түбегейлі шешілді деу қиын. Керісінше, су өткізу жүйелерін жаңғырту, жолдарды қайта жобалау, жаңбыр суын жинап, тиімді пайдалану тетіктерін қарастыру – болашаққа бағытталған нақты қадам болмақ.

Табиғаттың тосын мінезіне өкпе артудан ештеңе өнбейді. Керісінше, сол мінезге бейімделген, төзімді әрі сапалы инфрақұрылым қалыптастыру – жергілікті басқарудың басты міндеті. Тұрғындардың қауіпсіздігі, балалардың алаңсыз мектепке баруы, көліктің еркін қозғалысы – жай ғана тұрмыстық жайлылық емес, өмір сапасының көрсеткіші.

Жауын – береке. Бірақ сол берекені бейберекетке айналдырмау – біздің қолымызда. Кешенді көзқарас пен жауапкершілік ұштасқанда ғана аудан көшелері нөсерден кейін көлшікке емес, тазалық пен тәртіптің айғағына айналары анық.