Қоғам үлкен өзен секілді. Ол өз арнасымен ағып, дамуға бет алған сайын, алдына түрлі бөгет кездеседі. Сол бөгеттердің ішіндегі ең қауіптісі – коррупция. Ол көзге көрінбейтін, бірақ қоғамның тамырын іштен кеміретін улы індетке ұқсайды. Коррупция салдарынан әділдік ұмытылып, адал еңбек бағаланбай қалады. Ал бұл халықтың жүрегіндегі үміт отын өшіреді.

Тарихқа көз жүгіртсек, кез келген мемлекеттің құлдырауы көбінесе әділетсіздік пен жемқорлықтан басталған. Әділдікті саудаға салу – адамзаттың ар-намысына қарсы жасалған қылмыс. Әсіресе, жастардың бойында әділеттілікке деген сенім жоғалғанда, қоғамның болашағы да бұлыңғыр тартады. Ұлы Абайдың өзі әділдік пен адалдықты өмірдің басты қағидаларының бірі деп санаған. Оның «Адамның адамшылығы – ақыл, ғылым, жақсы ата, жақсы ана, жақсы құрбы, жақсы ұстаздан» деген сөзі тек жеке тұлғаның ғана емес, бүкіл қоғамның кемелдену жолын көрсетеді. Ал коррупция осы асыл құндылықтарды жоққа шығарады. Біреулер парамен мансапқа жетіп, адал еңбек еткендер көлеңкеде қалған кезде, әділетсіздік белең алады. Мұндай жағдайда елдің рухани түсуі мен моральдық құндылықтарының құлдырауы – заңдылық. Коррупция тек жеке адамдардың ғана емес, бүкіл қоғамның тағдырына әсер етеді. Бауыржан Момышұлының «Тәртіпке бағынған ел құл болмайды» деген сөзі осы тұста ерекше мәнге ие. Себебі парақорлық жайлаған жерде тәртіп пен заңның құны қалмайды. Адамдар заңды әділет іздеп емес, пара беру арқылы шешуге үйренгенде, қоғамның іргесі сөгіледі. Бұл тек экономикалық тоқырауға ғана емес, рухани құлдырауға да әкеп соғады. Дегенмен әр түннің артынан таң ататынын ұмытпауымыз керек. Қоғамда әділдік орнату – әр адамның қолында. Егер әрқайсымыз өз жүрегімізге үңіліп, адалдық пен әділдікті өміріміздің қағидасы етсек, бұл індетті жеңуге болады. Себебі шындық пен әділет салтанат құрған жерде ғана нағыз өркениет гүлденеді. Қорытындылай келе, коррупция – адамзаттың ар-намысы мен қоғамның дамуына қойылған тас қабырға. Бірақ бұл қабырғаны бұзу – әрқайсымыздың қолымызда. Егер біз адалдықты ту етіп, әділдік үшін күресуді өмірлік парызымызға айналдырсақ, болашақ ұрпаққа жарқын қоғам сыйлаймыз. Ал бұл – ең үлкен жеңіс болмақ. Ақерке ҒАНИҚЫЗЫ

, №159 Еңбекші орта мектебінің

11-сынып оқушысы