Солардың бірі – Жапониядан келген жұп. Олардың айтуынша, бұдан 10 жыл бұрын 1 ай Алматыда тұрған, сол кезде қазақ тілін меңгеріп алған.

"Біз Жапониядан келдік. Бұл - менің жолдасым, ол да жапон. Астанадағы Көшпенділер ойындары ұнап жатыр. Астана да ұнап жатыр. Қазақ тілін Жапонияда өз бетімізше үйреніп алдық", - дейді олар.

Жапониялық танымал блогер Юджи де Қазақстанға келді. Оның айтуынша, елімізге үш рет келген.

"Маған табиғаты, қазақтардың қонақжайлығы қатты ұнайды. Көп адам мені қазақ деп ойлайды, мен жартылай жапон, жартылай ирландиялықпын, ал оның ортасы - Қазақстан. Өте қызық екен, қазақтар жылқыны жақсы көреді, ал ет - менің сүйікті асыма айналды", - дейді ол.

Ал америкалық қонақ этноауылда әйеліне сыйлық алмақшы болады. Сол кезде бәрімен қазақша тілдесіп, жақсылық тілеп кетті.

Америкадан келген Калын да қазақ тілінде сайрап тұр.

"Менің атым - Калын. Мен америкалықпын. Американың Вашингтон қаласынан келдім. АҚШ-ты да, Қазақстанды да қолдаймын. Менің ойымша, достық жеңеді", - дейді ол видеода.

Этноауылда қолдан жасалған бұйымдар сатып отырған қазақ әжелері франциялық туристерді Эдит Пиафтің Non, je ne regrette rien әнін орындап, таң-тамаша етті.

Айта кетейік, бұған дейін домбыра шерткен қазақ қызы Көшпенділер ойындарына келген испаниялықтарды таңғалдырған еді.

Еске салайық, 8 қыркүйекте Астанада Дүниежүзілік көшпенділер ойындары басталды. V Дүниежүзілік көшпенділер ойындарының алғашқы күндерінде Қазақстан ұлттық құрамасы 25 медальға ие болып, көш бастады.