Өскен өңір Osken-onir.kz ақпараттық агенттігі
» » Электрондық үкімет порталы жаңа қызметпен толықты

Электрондық үкімет порталы жаңа қызметпен толықты

Еңбек ету қабілетінен айырылған азаматтар енді Мемлекеттік әлеуметтік сақтандыру қорынан әлеуметтік төлем тағайындау бойынша өтінішті электрондық үкімет порталы арқылы беруіне болады. Қызмет көрсетудің бұл жаңа форматы ҚР Еңбек және халықты әлеуметтік қорғау министрлігі мен ҚР Цифрлық даму, инновациялар және аэроғарыш өнеркәсібі министрлігінің бірлескен жұмысының арқасында іске асырылуда.
Ал азаматтар бұл қызметті пайдалану үшін eGov.kz порталы арқылы «Отбасыларға көмек» бөлімінде өтініш беру үшін «Еңбек ету қабілетінен ­айырылу жағдайына әлеуметтік төлем тағайындау» тармағын таңдау қажет. Осыдан кейін пайдаланушы порталда авторизациялануы, онлайн қызметке тапсырыс беруі, барлық міндетті мәліметтерді толтыруы және өтінімге электрондық-цифрлық қолтаңбамен қол қоюы тиіс. Қызмет көрсету мерзімі 8 жұмыс күнін құрайды. Еңбек ету қабілетінен айырылу жағдайына әлеуметтік төлем тағайындау туралы хабарлама немесе бас тарту туралы дәлелді жауап пайдаланушының жеке кабинетіне жіберіледі.
Қызметті алу үшін мүгедектіктің болуы және еңбек ету қабілетінен айырылу дәрежесі туралы ақпарат (МӘС бөлімінің қорытындысы), сондай-ақ Мемлекеттік әлеуметтік сақтандыру қорына әлеуметтік аударымдардың жай-күйі және оған соңғы 24 айда түскен түсімдер туралы деректер талап етіледі. Олар Еңбек министрлігінің ақпараттық жүйелерінен автоматты түрде тексеріледі.
Айта кетейік, бұрын өтініштер ХҚКО және медициналық-әлеуметтік сараптама (бұдан әрі – МӘС) бөлімдері арқылы қағаз түрінде қабылданған еді.

Рамазан Бектұрғанұлы
01 қыркүйек 2022 ж. 308 0