Қарағандыдан қанжығалы оралды

«Шынықсаң – шымыр боласың» , «Спорт – денсаулық» кепілі демекші, дене жаттығуы адам баласына қашан да пайдалы. Әсіресе, пандемия уақытында спортпен шұғылдану денсаулыққа үлкен көмек.
16-18-ші сәуір аралығында Қарағанды облысында балалар және жасөспірімдер арасында грепплинг және грепплинг ги спорт түрінен республикалық чемпионат өтті. Чемпионатқа 2008-2009 жылғы жасөспірімдер қатысып, бақ сынасты. Нариман Елеупановтың жетекшілігімен дайындалған жасөспірімдер жаттықтырушының еселі еңбегін қайтарып, жүлдегер атанды. Жүлдегерлер бүгінгі таңда №49 орта мектептің оқушылары – Аяулым Сейтман мен Жандос Сейдахмет. Чемпионат барысында Аяулым Орақбайқызы 1 күміс, 1 қола иеленсе, 27 кг көрсеткішінде өнер көрсеткен Жандос 2 күмістен алқа тақты. Екі оқушы да №9 Шиелі аудандық олимпиядалық резервтің мамандандырылған балалар және жасөспірімдер мектебінің жас спортшысы.

Күнделікті жаттықтырушының қадағалауымен тынбай жаттыққан жас спортшылар 3 күміс, 1 қоламен қанжығасын майлады. Ата-ананың, ұстаздар мен бапкерлерінің үмітін ақтаған жас спортшыларға құтты болсын дейміз.