Шағын инновациялық кәсіпкерлікті дамытатын компаниялар анықталды

​​​​Технологиялық даму жөніндегі ұлттық агенттік отандық инноваторлардың жобаларына қолдау көрсететін 3 бизнес-инкубаторды анықтады, деп хабарлайды Baq.kz тілшісі.

Шағын инновациялық кәсіпкерлікті дамытуға қолдау көрсететін бизнес-инкубаторларды іріктеу байқау арқылы жүзеге асырылды. Нәтижесінде тәуелсіз комиссия шешімімен «BeInTech», «Клуб молодых предпринимателей», «SmArt Point Almaty» компаниялары жеңіске жетті.
Енді Технологиялық даму жөніндегі ұлттық агенттік олармен 3 жылға келісімшарт жасап, қаржылық және әдістемелік көмек көрсетеді.
Сондай-ақ агенттік аталған компаниялардағы жобалардың шығыстарын 50%-ке дейін қаржыландырады.
Әрбір бизнес-инкубаторға жылына 35 млн теңгеден аспайтын қаржы құйылады. Қаржы «Бизнестің жол картасы – 2020» бағдарламасы аясында бөлінеді.
Сонымен қатар келесі жылы аталған 3 бизнес-инкубатордың резиденттері 50 млн теңге көлеміндегі мемлекеттік грантқа ие болу мүмкіндігі бар.