«Қазақ чемпиондары» туралы комикс жарық көрді
Жасампаз жасөспірімдердің әдебиеттің жаңа жанры – комикске деген ынта-ықыласы күннен-күнге артып келеді. Көздің жауын алатын көркем илюстрация мәтінді оқылымды етіп, оқиғаны қызықты әрі тартымды қылады. Мұхиттың арғы жағындағы мұқтарам елдің назарын тоқтатқан жарқын жанрдың қазіргі таңда қазақ авторларының да қаламынан туындап жатқаны көңілге қуаныш ұялатады. Сөзімізді қуаттайтын Астанадағы ұлттық академиялық кітапханада өткен спорт журналисі Аслан Қаженов пен жазушы, журналист Азамат Әбілқайырдың «Қазақ чемпиондары» атты балаларға арналған комикс кітаптарының тұсаукесері. Бес кітаптан тұратын «Қазақ чемпиондары» комиксі Париж-2024 Олимпиада ойындарының жүлдегерлеріне арналған. Соның ішінде дзюдошы Елдос Сметов, боксшы Назым Қызайбай мен Айбек Оралбай, палуан Демеу Жадыраев, гимнаст Нариман Құрбанов, дзюдошы Ғұсман Қырғызбаев, мергендер Александра Ле мен Ислам Сәтбаев және даңқты боксшы, Ұлттық Олимпиада комитетінің Президенті Геннадий Головкин де бар.
«Мақсатымыз, комикс арқылы қазақ баласына ел намысын қорғап жүрген спортшылардың нағыз батыр екенін және сол батырлардың арамызда екенін көрсету. Әр үлкен арманның артында қажырлы еңбек тұрғанын түсіндіру» дейді кітап авторлары.
Кітапта ел намысын қорғаған спортшылардың балалық шағы, алғашқы додаларынан үлкен сайыстарға дейінгі кәсіби мансабы бала тіліне түсінікті тілде ұсынылған. Іс-шараның алғашқы құттықтау лебізін кітапхана басшысы Ғазиза Құдайбергенқызы білдірді. Ол комикс жанры қазақ оқырмандарына алғаш рет Жүсіпбек Аймауытұлының «Жаман тымағы» арқылы жеткенін атап өтіп, бүгінгі жарық көріп жатқан кітаптар соның дәуір дидарына сай жанданған жалғасы екенін айтты.
Келесі кезекте сөз алған «Хабар» агенттігінің басқарма төрағасы Кемелбек Ойшыбаев қос автордың бұл тақырыпқа үлкен ізденіспен келгенін айтты.
«Қазақ комиксінің тақырып аясы кеңейіп келеді. Бұған дейін тарихтағы батыр бабаларымыздың өнегелі өмірі комикс беттеріне бедерленгенін білеміз. Ал бүгінгі жарық көріп жатқан комикстер топтамасы сіз бен біздің ортақ заманымызда өмір сүріп жатқан қаһармандарды таныстырады. Осы арқылы кешегі Қабанбай мен Бөгенбайлар қазір де арамызда жүргенін түсіндіреді. Жаңа дүниенің жарнамасын арттыра білсек, бұл қазақ балалары мен жасөспірімдерінің, тіпті тұтас ұлттың өркендеуіне ықпал ететін әлеуетті құрал бола алады», деді К. Ойшыбаев.
Айта кетейік, комикстер туризм және спорт индустриясы қорының қолдауымен жарық көріп, еліміздің барлық спорт мектептеріне тегін таратылатын болады.
