Сөз бастау құрметі берілген аудан әкімі А.Насриддинұлы өткен жылы атқарылған жұмыстарға тоқталып, 2025 жылдағы жаңа жоспарларды тілге тиек етті. Тиісінше еңбек адамдарын ұлықтай отырып, бұл өскелең ұрпақ үшін үлкен өнеге екендігін жеткізді.

– Ұлу жылы біздің аудан үшін жетістіктерге толы жыл болды. Құрметті, ақ жаулықты аналар, «Отан – отбасынан басталады». Сол отбасының ұйтқысы, берекесі және қуанышы сіздерсіздер. Мемлекеттің, келешектің көркеюі тікелей өздеріңізге байланысты. Бүгінде біздің ауданда қаншама нәзік жандар ер адамдардан қалыспай, отанымыздың гүлденуіне өздерінің мол үлестерін қосып жүр. Баршаңызға зор денсаулық, ұзақ та бақытты өмір және отбасыларыңызға ересен береке тілеймін, – деп жылы лебізін жаудырды.

Әдемілік пен шуақ тұнған шарада өнімді еңбек етіп, өз салаларында оза шапқан ұлт аналары үздіктер қатарынан көрінді. Әр саланың үздіктерін арнайы түрде аудан әкімі Айтбай Жандарбеков пен аудандық әйелдер кеңесінің төрайымы Нәйлә Палымбет марапаттау рәсімін жасады.

Атап айтар болсақ, Гүлсім Дарибаева «Озат тракторист», Малика Фазылова «Үздік әріп теруші», Шәркүл Мүсілімова «Атақты күрішші», Роза Әлжанова «Озат сауыншы», Нұржамал Омарова «Іскер көлік жөндеуші» номинациясымен марапатталды. Сонымен қатар баспасөз ардагерлері де «Өскен өңір» газетінің 85 жылдық төсбелгісін сол жақ кеуделеріне тақты. Нағыз қаһарман қыздар озат атанған кеште жұпардай ән шырқалып, көпшіліктің көңілі шаттыққа бөленді.

Басқосудың соңында жанарына нұр, жүрегіне мейірім ұялаған аналар жаңа орталықпен танысты. Барлық бөлмелері заманауи құралдармен жабдықталғанын көрді. Олар орталықтың ел игілігіне ұсынылғанына дән риза болысты.