Сағадат Нұрмағамбетов талай сыннан өткенмен, тағдыры жарқын адам. Ата-анасынан ерте айырылып қалып, ағасы Сағиттің отбасында тәрбиеленді. Соғыс басталған кезде үлкен ағасы Сағит бірінші болып майданға аттанып, көп ұзамай қаза тапты. Одан кейінгі шақырту Сағадатқа келді. Ол Түрікменстандағы пулемет учлищесін бітіріп, 1942 жылы майданға жіберілді. Солтүстік Кавказдан Берлинге дейін жетіп, батальон командирі кезінде жеңісті қарсы алды. Оның батальоны гестапо штабын басып алу және Рейхстагқа шабуыл жасау кезінде қанды шайқастарға қатысты. 1945 жылы Сағадат Нұрмағамбетов Кеңес Одағының Батыры атағына ие болды.
Сағадат Қожахметұлы Нұрмағамбетов тұрған үйдің жанындағы мемориалдық тақтаға гүл шоқтарын қойғаннан кейін гарнизон әскери қызметшілері батырдың ерлігіне құрмет көрсетіп, салтанатты маршпен жүріп өтті. «Қарулы күштермен байланысты барлық мерекелік іс-шаралар әрқашан Сағадат Қожахметұлы Нұрмағамбетовті еске алудан басталады. Биылғы жыл ерекше. 25 мамыр – оның 100 жас мерейтойы. Армия генералы Нұрмағамбетовтің тәуелсіз Қазақстанның Қарулы күштерін құрудағы сіңірген еңбегі зор, сондықтан біз оны жадымызда сақтап, құрметтеуге тиіспіз», деді экс-қорғаныс министрі генерал-полковник Әлібек Қасымов.
Сағадат Қожахметұлының немересі Айжан Нұрмағамбетова атасы туралы естеліктерін әңгімелеп,  атасы үшін парыз, ар-намыс пен ерлік жай сөздер ғана емес екенін айтты.
«Бұл қасиеттер атамның ұстанымы болды. Ол тек бағыныстыларға ғана емес, өзіне де қатал, талапшыл болды», деді Айжан Нұрмағамбетова. Іс-шара 28 панфиловшы-гвардияшылар саябағында жалғасты, онда Алматы өңірлік гарнизонының басшылығы мен Қарулы күштердің ардагерлері Мәңгілік алауға гүл шоқтарын қойып, гарнизонның әскери қызметшілері салтанатты маршпен өтті.