Мемлекет басшысының бастамасымен республика көлемінде «Таза Қазақстан» экологиялық акциясы басталғаны белгілі. Тазалық жұмыстары аясында Сыр елінде де қолға алынған «Киелі мекен» апталығы ұйымшылдықпен жүзеге асырылып жатыр.

Аталған жоба аясындағы тазалық жұмыстары Шиелі ауданына қарасты Оқшы ата мазаратында жалғасын тапты. Сенбілікке барлық ауылдық округтерден жиналған 270 адам, 11 техника жұмылдырылды. Олар әйгілі жеті әулие, есімі дүйім елге белгілі ділмар датқалар жерленген киелі орынның аумағын тазартып, кесене айналасын қоқыстардан арылтып, көшеттер отырғызды. Тұрғындар әулиелердің ордасына айналған мекенді көркейту ісіне жұмыла атсалысып, бір қорымда жатқан арыстардың рухына Құран бағыштады.