Қазақстан спортшылары Олимпиада ойындары мен әлем чемпионаттарында жоғары нәтижелерге қол жеткізіп жүр. Әсіресе бокс, ауыр атлетика, күрес, жеңіл атлетика секілді спорт түрлерінде қазақ спортшыларының әлеуеті жоғары екені дәлелденді.

Мәселен, Владимир Смирнов еліміздің атын алғашқылардың бірі болып әлемге танытып, қысқы Олимпиадада топ жарды. Ал Бекзат ­Саттарханов Сидней төрінде жасындай жарқырап, бүкіл халықтың жүрегінен орын алды. Оның қайсар рухы мен жеңіске деген жігері бүгінгі жас спортшыларға үлгі.

Бокстан қазақ елінің мерейін үстем еткен тағы бір тұлға – Бақтияр Артаев. Афины Олимпиадасында ол тек алтын медаль алып қана қоймай, үздік боксшы ретінде де танылды. Ал Серік Сәпиев Лондон Олимпиадасында қарсылас шақ келтірмей, техника мен шеберліктің биік үлгісін көрсетті.

Ауыр атлетикада да қазақ спортшыларының жетістігі зор. Илья Ильин мен Зульфия ­Чиншанло сияқты саңлақтар әлем рекордтарын жаңартып, ел намысын қорғады. Ал Ольга Рыпакова жеңіл атлетикада тарихи алтынға қол жеткізіп, қазақ қыздарының да биік белестерді бағындыра алатынын дәлелдеді.

Бұл есімдер – қазақ спортының шоқтығын биіктеткен тұлғалар. Олардың әрқайсысының жеңіс жолы – маңдай тер мен қажырлы еңбектің нәтижесі. Олар тек чемпион ғана емес, ұлт мақтанышына айналған дара тұлғалар.

Қазақ спортының әлеуеті – осындай ерлердің ерлігімен, қыздардың қайсарлығымен өлшенеді. Бүгінгі жас буын осы саңлақтарға қарап бой түзейді, биік мақсаттарға ұмтылады. Демек, спорттағы жетістік – ұрпақ сабақтастығының айқын көрінісі.

Қазақ спортының басты артықшылығы – табиғи дарын мен қайсар мінез. Ұлттық болмысымызға тән төзімділік, батылдық, намысқойлық қасиеттер спортта айқын көрініс табады. Сонымен қатар, көкпар, қазақ күресі, бәйге сияқты ұлттық спорт түрлері де қайта жаңғырып, халықаралық деңгейде насихатталып келеді. Бұл – ұлттық мәдениеттің де дамуына серпін береді.

Соңғы жылдары елімізде спорт инфрақұрылымы жақсарып, жаңа спорт кешендері, алаңдар мен секциялар ашылуда. Ауылдық жерлерде де бұқаралық спортқа көңіл бөлініп, жастардың спортпен айналысуына жағдай жасалып жатыр. Бұл – болашақ ­чемпиондарды тәрбиелеудің негізі.

Дегенмен, қазақ спортының әлеуетін толық пайдалану үшін әлі де жүйелі жұмыстар қажет. Жаттықтырушылардың біліктілігін арттыру, спорт ғылымын дамыту, жасөспірімдер спортын қолдау – маңызды бағыттардың бірі. Сонымен қатар спортшыларды әлеуметтік тұрғыдан қолдау да өзекті мәселе болып қала береді.

Қорытындылай келе, қазақ спортының мүмкіндігі мол, болашағы жарқын. Ең бастысы – осы әлеуетті тиімді пайдаланып, жүйелі түрде дамыту. Сонда ғана еліміздің спортшылары әлемдік ареналарда тұрақты түрде жоғары нәтиже көрсетіп, Қазақстанның абыройын асқақтата береді.