20 қаңтар күні елорданың Астана Арена стадионында алматылық Қайрат бельгиялық Брюгге командасымен УЕФА Чемпиондар лигасы аясында ойнайды. Аталған матчқа билеттер сатылымы басталғанын Freedom Ticketon сервисі мәлімдеді, деп хабарлайды Egemen.kz.

Кездесу қыстың ең көп күтілетін спорттық оқиғаларының біріне айналмақ. Қазақстандық клуб Еуропаның атақты ұжымымен күш сынасады, ал «Астана Арена» трибуналары тағы да үлкен футбол кешінің атмосферасына толады.

Билет рәсімдеу үшін пайдаланушы мына деректерді көрсетуі қажет:

– ЖСН;

– Ұялы телефон нөмірі;

– Электронды пошта мекенжайы.

Төлем тек бір банк картасымен жүзеге асырылады және бір адамға екі билеттен артық сатып алуға рұқсат етілмейді.

Матч өтетін күні SMS-хабарлама жіберіледі. Ал көрсетілген электронды поштаға QR-билеті бар сілтеме жолданады.

Билеттерді тек ресми сатылым сервистері арқылы сатып алу ұсынылады. Үшінші тұлғалардан немесе бейресми көздерден алынған билеттер:

– Стадионға кіргізбеуге;

– Қаражаттан толық айырылуға;

– Билеттің өтемақысыз жойылуына әкелуі мүмкін.

Ресми арналар – билеттің түпнұсқалығына, мәміленің қауіпсіздігіне және матчқа кіруге кепіл болатын жалғыз жол.