Жыл сайын жаңа жыл қарсаңында мұсылмандар арасында «Жаңа жылды тойлауға болады ма?» деген сұрақ болады.

Осы тұрғыда қысқаша баян етейік. Алла Тағала Құранда былай дейді:

«Бұл күндерді адамдар арасында алма-кезек айналдырамыз»

(Әли Имран сүресі, 140-аят)

Бұл аят уақыттың Алланың қалауымен ауысатынын көрсетеді. Жаңа жыл бұл – жаңа уақыт, жаңа жоспарлар. Ал діни тұрғыда қабылдап дін мен дәстүрге қайшы келетін наным-сенім орындалған болса, Пайғамбарымыз (с.а.с) «Кім бір қауымға ұқсаса, солардан болады» деген.

(Әбу Дәуд)

Сондықтан жаңа жылды діни мейрам деп қабылдап, өзге сенімге еліктеу – дұрыс емес. Алайда Ислам тыйым салынбаған нәрсеге, яғни туған-туыс бас қосып дәм-тұздан алып араласып, көңіл-күйді көтерсе, Ислам бұны дұрыс емес демейді.

Алла Тағала: «Уа, иман келтіргендер! Алла халал еткен нәрселерді өздеріңе харам етпеңдер» (Мәида сүресі, 87-аят)

Егер Жаңа жылда: күнә жасалмаса, ішімдік, арсыздық болмаса, оны қасиетті түн деп сенбесе, онда отбасымен отырып, шүкір айтып, жақсы ниет тілеу – күнә емес.

Пайғамбарымыз (с.а.с) тағы да: «Амалдар ниетке байланысты» деген. (Бухари, Муслим)

Қорытынды: Жаңа жыл – діни мейрам емес, ол – уақыттың ауысуы және мемлекеттік мейрам! Мұсылман үшін ең маңыздысы – иман, ниет және амалдың тазалығы.

Халқымыз аман, жұртымыз тыныш болғай!