АХАТ – әр адамның өміріндегі маңызды оқиғаларды заңды түрде тіркейтін мекеме. Бұл бөлімнің мамандары өздерінің адал еңбегімен және заңдарды сақтауымен жоғары әлеуетті мемлекет пен елдің бәсекеге қабілеттілігін қалыптастыруға үлес қосуда. Миллиондаған шаңырақтың шырағын жағуға дәнекер болған, отбасы институтының қайнар көзінде тұрған, өмірге келген әрбір сәбидің алғашқы құжаттарын рәсімдеуші бірегей органның қызметін қалай мадақтап айтпасқа?! Мұнда қызмет ететін тәжірибелі мамандардың еңбегі де орасан. Солардың қатарында Шиелі аудандық АХАТ бөлімінің басшысы – Ақбота Бейбітқызы бар. Саналы өмірін мемлекеттік қызметке арнаған білікті маман 2010 жылдан бастап АХАТ саласында қызмет етеді.

– Жалпы мен Жалағаш ауданы, Еңбек ауылында дүниеге келгенмін, Білімім жоғары, мамандығым заңгер. 20 жылдан бері мемлекеттік қызметтемін, ал оның 15 жылында азаматтық хал актілерін тіркеуде қызмет жасап келемін. 2010-2017 жылдар аралығында Қызылорда қалалық АХАТ бөлімінде еңбек етсем, 2017 жылдан бастап Шиелі ауданында жұмыс жасаймын. Қазір «Азаматтарға арналған үкімет» мемлекеттік корпорациясы коммерциялық емес акционерлік қоғамы Қызылорда облысы бойынша филиалының аудандық азаматтық хал актілерін тіркеу бөлімінің басшысы қызметін атқарудамын. Ауданда жыл басынан бері 55 жас отбасы некесі заңды түрде тіркелсе, оның ішінде 17 жұптың неке қию туралы куәліктері салтанатты түрде рәсімделіп табысталды. Сол сияқты өңірде 307 сәбидің туу туралы куәліктері тіркелсе, 20 -дан астам жас атааналардың ұсынысы бойынша нәрестелерінің туу туралы куәлігі салтанатты түрде рәсімделді, – деді кейіпкеріміз.