Жаңа жылда жаңа күнтізбе ғана ауыспайды, жыл иесі де ауысады. Биыл Ұлу жылын шығарып салып, орнына Жылан келмек. Жылан жылынан не күтеміз? Жаңа жылды қалай қарсы алу керек? 2025 жыл қандай істерге қолайлы болмақ? Жауабын материалымыздан оқып көріңіз.Жылан – ерекше жаратылыс. Шығыс мәдениетінде оның ақыл, парасат, айла, адалдық сияқты жақсы қасиеттері көп айтылады. Ал өмірде ол өте улы, қауіпті мақұлықтардың бірі. Қазақ дүниетанымында да жыланға баса мән берген. Үйге кірген жыланды өлтірмей, басына ақ құйып шығарып салатын дәстүріміз де бар.

Жылан – жай ғана күннің көзінде қыздырынып жатып, содан ләззат ала білетін жаратылыс. Яғни жылан жылында бізге де қуана білу, айналамыздан ләззат ала білу, өзімізге жағдай жасай білу маңызды. Біреу оның мазасын алып, тыныштығын бұзатын болса, шап беріп, атылып, айналасын қопарып тастайтыны да бар.

Жылан жылы адам баласына аса бір көңілсіздік әкелмеуі керек. Себебі мазасын алғанды жыланның өзі де ұнатпайды. Өзінің тыныштығын бұзбағанын қалайды. Ал жасыл түсі – гармонияның, бейбітшіліктің, тыныштық пен жайлылықтың түсі. Жылан жылында жасыл, қызыл және сары түстерге басымдық береміз.

Жылан – қызғаншақ. Сондықтан үйдегі ескі-құсқы дүниенің бәрін тастап, Жаңа жыл иесіне орын босатамыз. Қобдишаға тиын-тебен салып қоюға да болады. Себебі жыланға жататын жер керек.

Қытай жұлдызданамасына сәйкес Жылан жылы Сиыр, Қоян, Қой, Мешін жылы туған жандарға сәттілік әкеледі. Тышқан, Жылқы және Ұлу жылы туғандарға абай болу қажет. Ал Жылан жылы туғандарға бұл жыл ауырлау болмақ. Қазақ дүниетанымында да мүшел жас жеңіл келмеген.

Қызыл конвертке ақша салып беруге болады. Жыланның суреті бар заттар, шай, ыдыс-аяқ пен тәттілер тамаша сыйлық болмақ.  Жылан жылында ақ және қара түсті сыйлықтар, әмиян, сағат, айна мен аяқ киім сыйлауға болмайды.

Ал нумерология бойынша 2025 жыл – 9 санының вибрациясымен өтеді. Тоғыз – қайшылыққа толы, өте күшті, қуатты сан. Себебі тоғыз санын Марс басқарады. Марс – соғыс, ашу, агрессия планетасы. Тоғыздық жылында психолгиялық, эмоционалдық, жаһандық тұрақсыздық орын алуы мүмкін. Сондай-ақ тоғыздық жылы саяхаттауға қолайлы жыл. Тоғыз жылдық цикл аяқталатын кезең. Ескінің бәрін тастап, бұрынғы істің бәрін тәмамдап, нүктесін қойып, жаңа трансформацияға өтетін жыл. Өзгеріс жылы. 2025 дағдарыс, қаржылық тәуекелдермен байланысты болады. Сол себепті аяқ асты акция, биткоин немесе алтын сатып алуға болмайды. Бәрін зерттеп, зерделеп барып алу керек.